ᑎᑎᕋᖅᓯᒪᔪᑦ

ᐅᖃᐅᓯᖃᕐᓂᖅ ᐊᐱᖅᑯᑎᒥᑦ


ᐅᓇ ᐃᓕᓐᓂᐊᕈᑎ ᑕᑯᓐᓇᖅᑕᕗᑦ ᖃᓄᖅ ᐅᖃᐅᓯᖃᕐᓂᐊᓂᕐᓂᒃ ᐊᐱᖅᑯᑎᐅᔪᒥᑦ ᐊᒻᒪ ᐱᓕᕆᐊᕆᓗᒍ ᑐᓴᕋᑦᓴᐅᑉ ᐃᓗᐊᓄᑦ ᑭᐅᔪᓐᓇᖏᒃᑯᕕᐅᒃ ᐊᒻᒪ ᑭᐅᔪᓐᓇᕈᕕᐅᓗ. ᓯᕗᓪᓕᕐᒥ, ᑕᑯᒋᐊᕐᓚᕗᑦ ᐊᐱᖅᑯᑎᐅᔪᖅ.

ᐃᓚᖓ 1: ᑐᑭᓯᐊᓂᖅ ᐊᐱᖅᑯᑎᒥᑦ

ᐊᑑᑎᖃᒻᒪᕆᑦᑐᖅ ᑐᑭᓯᓯᒪᒋᐊᖃᕐᓂᕆᔭᐃᑦ ᐊᐱᖅᑯᑎᐅᔪᒥᑦ ᐊᒻᒪ ᐃᕝᕕᑦ ᐊᒻᒪ ᐊᐱᕐᓱᖅᑎᒋᔭᐃᑦ ᐊᔾᔨᒌᒥᑦ ᑐᑭᓯᓯᒪᒋᐊᖃᕐᓂᓯᒃ.

ᐊᓱᐃᓪᓛᒃ, ᓇᓗᓇᖅᑐᒥᑦ ᐊᐱᕆᔭᐅᒍᕕᑦ, ᐊᐱᖅᑯᑎᒥᑦ ᑐᑭᓯᐸᓗᑦᑕᓐᓂᒃ ᑭᓯᐊᓂ ᖁᓚᕆᓪᓗᒍ, ᐊᓯᐊᒍᑦ ᐅᖃᐅᓯᕆᔪᓐᓇᖅᑕᐃᑦ ᐊᐱᖅᑯᑎᐅᔪᖅ ᐊᒻᒪ ᑭᐅᒋᐊᑦᑕᐅᑎᒋᓕᕐᓗᒍ. ᓇᓗᓇᐃᔭᐃᓇᓱᓐᓂᐊᕐᓂᖓ ᐱᕙᓪᓕᐊᔪᓕᕆᔨᐅᑉ ᐅᑕᖅᑭᖏᑕᐃᑦ, ᖃᐅᔨᒪᑎᑐᐃᓐᓇᓯᐊᖅᑕᑎᑦ ᑐᑭᓯᐊᓂᕐᓂᒃ ᐊᐱᖅᑯᑎᐅᔪᒥᑦ.

ᐳᐃᒍᔾᔭᐃᕐᓯᒪᓂᐊᖅᑕᑎᑦ ᐱᖓᓱᐃᑦ (3) ᐃᓗᓕᖏᑦ ᑐᑭᓕᐅᕈᑎᒋᓯᒪᔭᑦᑕ ᐱᕙᓪᓕᐅᑎᑦᓯᐊᖅᑐᒥᑦ ᐅᖃᖅᑎᒥᑦ. ᐱᒻᒪᕆᐅᔪᖅ ᐃᑉᐱᒍᓲᑎᓐᓂᑦ ᓴᖑᑎᑕᐅᑦᑕᐃᓕᒪᒋᐊᖃᕐᓂᕐᓂᒃ ᑕᐃᒃᑯᓂᖓ ᐱᒻᒪᕆᐅᔪᒥᑦ ᑲᔪᓯᑦᓯᐊᕆᐊᖃᕐᓂᕐᒧᑦ ᐱᔾᔪᑎᓕᓐᓂᑦ ᓱᓇᑐᐃᓐᓇᕐᓄᑦ ᐃᑲᔫᑎᖃᖏᑦᑐᓂᑦ ᑲᔪᓯᑦᓯᐊᕈᑎᒋᓂᐊᖅᑕᖓᓄᑦ ᑐᓴᐅᒪᔭᐅᖁᔭᕕᑦ.

ᐆᑦᑑᑎᑦᓯᐊᕙᐅᔪᖅ ᑖᑦᓱᒧᖓ ᐱᕙᓪᓕᐊᔪᓕᕆᔨᐅᔪᖅ ᐃᓕᓐᓂᒃ ᐊᐱᕆᓐᓂᖅᐸᑦ ᐊᑕᐅᓯᐅᖏᑦᑐᒥᑦ – ᓲᕐᓗ “ᖃᓄᑎᒋ ᐱᓕᕆᐊᑦᓴᖅ ᐊᑭᖃᖅᐸ”, ᖃᖓᒃᑯᑦ ᐊᑐᓕᕆᐊᓛᖅᐸ”. ᐊᒻᒪ “ᓱᒻᒪᑦ ᓴᖅᑭᓚᐅᕐᓯᒪᔾᔭᖏᓚᐃᑦ ᖁᓖᑦ ᐊᕐᕌᒎᓚᐅᖅᑐᖅ ᑭᖕᖒᒪᑦᓯᓚᕆᑦᑎᓪᓗᑕ ᑕᒪᑦᓱᒥᖓ”. ᑕᕝᕘᓇᓕ ᐱᕙᓪᓕᐊᔪᓕᕆᔨᐅᔪᖅ ᐃᓕᓐᓂᒃ ᐳᐃᒍᔾᔭᐃᖁᔨᔪᖅ ᑖᒃᑯᓂᖓ ᐱᖓᓱᓂᑦ (3) ᐊᐱᖅᑯᑎᓂᑦ ᐊᒻᒪ ᑭᐅᓗᒋᑦ – ᓇᓪᓕᑭᑕᕐᓗᒋᑦ ᐊᐱᖅᑯᑎᐅᖅᑲᐅᓂᖏᑦ – ᐱᕕᖃᕐᕕᖓᓂ ᐃᕝᕕᑦ ᑐᓴᕋᑦᓴᓕᕆᔨᓄᑦ ᑭᐅᔾᔪᑎᐅᒐᔪᑦᑐᒥᑦ. ᐊᑯᓂᐅᓗᐊᖅᑐᖅ ᐃᑉᐱᒋᓂᐊᖅᑕᑎᑦ ᐊᒻᒪ ᑭᐅᔾᔪᑎᒋᔭᐃᑦ ᑕᑭᓗᐊᓕᕐᓗᓂ ᐊᒻᒪ ᓇᓗᓇᕐᓯᓗᓂ.

ᐊᓱᐃᓪᓛᒃ, ᓂᕈᐊᕐᓗᑎᑦ ᐃᓚᖓᓂᑦ ᐊᐱᖅᑯᑎᐅᔪᓂᑦ – ᖃᓄᐃᖏᑦᑐᖅ ᓇᓪᓕᐊᖑᒻᒪᖔᖅ – ᐊᒻᒪ ᑭᐅᓗᒍ. ᐱᓪᓗᐊᑕᐅᔪᖅ ᐃᖅᑲᐅᒪᓇᓱᐊᖏᓪᓗᒋᑦ ᐊᓯᖏᑦ ᐊᐱᖅᑯᑎᐅᔪᑦ – ᐃᑉᐱᒋᓗᐊᖏᓪᓗᒋᑦ. ᑭᐅᓚᐅᖅᑎᓪᓗᒍ ᐊᐱᖅᑯᑎᐅᔪᖅ ᑭᐅᔪᒪᔭᐃᑦ, ᐅᖃᕈᓐᓇᓕᕋᔭᖅᑐᑎᑦ ᐃᒪᐃᓕᓗᑎᑦ “ᒪᒥᐊᓇᐅᒐᓗᐊᖅ, ᐳᐃᒍᕐᓯᒐᒃᑯ ᐊᐃᑉᐸᖓ ᐊᐱᖅᑯᑎᐅᕋᑖᖅᑐᖅ, ᐅᖃᒃᑲᓐᓂᑲᐃᓐᓇᕉᒃ?”. ᑕᒪᓐᓇ ᐱᓕᕆᔾᔪᑎᒋᓪᓗᒍ, ᓇᓗᓇᐃᕐᓯᒪᒍᓐᓇᖅᑐᑎᑦ ᐊᐱᕆᖃᑦᑕᓂᐊᕐᓂᖏᓐᓂᑦ ᐊᑕᐅᓯᕐᒥᑦ ᐊᐱᖅᑯᒥᑦ.

ᑐᑭᓯᒐᑦᓴᐅᖏᑦᑐᒥᑦ ᐊᐱᕆᔭᐅᒍᕕᑦ, ᖃᓄᐃᖏᓯᐊᖅᑐᖅ ᐱᕙᓪᓕᐊᔪᓕᕆᔨ ᓇᓗᓇᐃᕐᓯᒋᐊᖁᓪᓗᒍ. ᖃᓄᐃᓕᐅᖅᑎᐅᖏᒻᒪᑕ ᐊᒻᒪ ᖃᓄᐃᓕᐅᖅᑕᐅᓇᓱᓐᓇᓪᓗ. ᐊᐱᕐᓱᕐᓂᐅᔪᖅ ᑲᑎᒪᔾᔪᑎᐅᕙᒻᒪᑦ ᐊᔾᔨᒌᑦᑑᓐᓄᑦ ᐊᒻᒪ ᑐᑭᓯᓯᒪᒋᐊᖃᖅᐸᒃᑲᕕᑦ ᐊᐱᖅᑯᑎᐅᔪᒥᑦ ᑭᐅᓇᓱᓚᐅᖏᓂᕐᓂ.

ᐊᐱᕐᓱᖅᑕᐅᑎᓪᓗᑎᑦ, ᐃᓱᒪᒍᓐᓇᖅᑐᑎᑦ “ᓵᖓᔭᑦᓴᐅᓂᕐᓂᒃ” ᐅᐱᓐᓇᕋᓂ ᑭᒡᒐᖅᑐᐃᒐᕕᑦ ᐃᕝᕕᑦ ᑲᑐᔾᔨᖃᑎᒌᖏᓐᓂᑦ ᐊᒻᒪ ᐃᓱᒪᒋᔭᐅᒐᕕᑦ ᖃᐅᔨᒪᓂᖃᕋᕕᑦ ᐊᐱᖅᑯᑎᐅᔪᒥᑦ. ᐊᓱᐃᓪᓛᒃ, ᐃᓱᒪᑐᐃᓐᓇᕆᐊᖃᖅᑐᑎᑦ ᐃᒪᐃᒋᐊᖃᕐᓂᕐᓂᒃ ᑭᐅᔾᔪᑎᖃᐃᓐᓇᕐᓗᑎᑦ ᓱᓇᓕᒫᑦᓯᐊᓄᑦ, ᑐᑭᓯᖏᒃᑲᓗᐊᕈᕕᐅᒃ ᐊᐱᖅᑯᑎᐅᔪᖅ, ᐊᓪᓛᑦ ᖃᐅᔨᒪᖏᒃᑲᓗᐊᕈᕕᐅᒃ ᑭᐅᔾᔪᑎᖓ.

ᖃᓄᐃᖏᓯᐊᖅᑐᖅ ᖃᐅᔨᒪᔭᖃᕋᓂ ᓱᓇᑐᐃᓐᓇᑦᓯᐊᓂᑦ. ᐊᑲᐅᖏᓕᐅᕈᑎᐅᕙᑦᑐᖅ ᑭᒃᑯᑐᐃᓐᓇᐃᑦ ᖃᐅᔨᒪᑎᑦᓯᓇᓱᐊᖅᑎᓐᓇᒋᑦ ᓱᓕᔪᒥᑦ ᐅᖃᐅᓯᖃᖅᑐᓂ ᐅᐃᒪᖓᔪᒥᑦ, ᑭᐅᓇᓱᐊᖅᑐᑎᒃ ᐱᐅᓂᖅᐹᒥᑦ, ᐅᓗᕆᐊᓇᖅᑐᒦᑎᑦᓯᒐᓱᑦᑐᓂ ᓇᓚᐅᑦᓵᑐᐃᓐᓇᖅᑐᓂ ᐅᕝᕙᓘᓐᓃᑦ ᓴᓇᓪᓗᓂ ᑐᑭᓯᒋᐊᕈᑎᓂᑦ ᓱᓕᖏᑦᑐᓂᑦ. 
ᖃᐅᔨᒪᖏᒃᑯᕕᐅᒃ ᑭᐅᔾᔪᑎᖓ ᐊᐱᖅᑯᑎᐅᑉ, ᐅᖃᑐᐃᓐᓇᖁᔪᖅ ᐃᒪᐃᑦᑐᒥᑦ “ᒪᒥᐊᓇᖅ, ᑕᒪᓐᓇ ᑐᑭᓯᒋᐊᕈᑎᐅᔪᖅ ᐱᓯᒪᖏᓇᒃᑯᑦ ᒫᓐᓇᐅᔪᖅ, ᑭᓯᐊᓂ ᐅᑎᕐᕕᒋᓛᑐᐃᓐᓇᖅᑕᒋᑦ”, ᐅᕝᕙᓘᓐᓃᑦ, “ᐳᐃᒍᑦᓯᐊᕐᒥᒐᒃᑯ ᑖᓐᓇ, ᖃᐅᔨᒋᐊᓚᐅᕐᓗᖓ ᐅᑎᕐᕕᒋᓛᕆᒃᑯᑦ.” ᐳᐃᒍᖅᑕᐃᓕᒋᑦ, ᖃᐅᔨᒋᐊᕐᓂᐊᕐᓂᕋᑐᐊᕈᕕᑦ, ᐱᒻᒪᕆᐅᔪᖅ ᖃᐅᔨᒋᐊᕐᓂᕆᔭᐃᑦ.

ᐅᖃᑦᓯᐊᒻᒪᕆᒃᑯᕕᑦ ᑭᐅᔾᔪᑎᖃᖏᓐᓇᕕᑦ ᑕᑎᒌᖃᑦᑕᐅᑎᓕᕈᓐᓇᖅᑐᓯᕐ ᐱᕙᓪᓕᐊᔪᓕᕆᔨᕐᓗ. ᓴᖅᑭᕋᓱᖏᒃᑯᕕᐅᒃ ᖃᐅᔨᒪᖏᓐᓂᕆᔭᐃᑦ ᓇᓗᓇᔾᔮᖏᒻᒪᑦ ᐊᒻᒪ ᐱᕙᓪᓕᐊᔪᓕᕆᔨᐅᔪᖅ ᐊᒻᒪ ᑐᓴᐅᒪᖁᔭᐅᔪᑦ ᐃᒻᒥᓂᒃ ᐊᐱᕆᓕᕋᔭᕐᒪᑕ, ᓱᓇᒃᑲᓂᕐᓂᒃ ᐅᖃᐅᓯᖃᑦᑕᐃᓕᒪᒋᐊᑦᓴᕕᑦ?

ᐃᓚᖓ 2: ᐊᐱᖅᑯᑎᐅᔪᑦ ᑭᐅᔭᕆᐊᖃᖏᑕᑎᑦ

 ᐱᖓᔪᐊᑦ ᑐᑭᓕᐅᕈᑎᐅᔪᑦ ᐱᕙᓪᓕᐅᑎᑦᓯᐊᕐᓂᐊᕈᓂ ᐅᖃᖅᑎᐅᔪᖅ ᐅᓇ “ᑐᕌᓪᓗᐊᖅᑐᒍ ᐅᖃᐅᓯᖃᕐᓂᖅ ᐊᐱᖅᑯᑎᒥᑦ.” ᐅᖃᐅᓯᖃᕐᓂᖅ ᑐᑭᖃᖅᑐᖅ ᓇᓪᓕᐊᑐᐃᓐᓇᖅ: ᑭᐅᓂᖅ ᐅᕝᕙᓘᓐᓃᑦ ᐅᖃᐅᓯᖃᕐᓂᐊᕐᓂᖅ ᖃᓄᐃᒻᒪᑦ ᑭᐅᔪᓐᓇᖏᓐᓂᕐᓂᒃ. ᐅᖃᐅᓯᕆᓚᐅᑐᐊᕈᕕᐅᕐ ᐊᐱᖅᑯᑎᐅᔪᖅ, ᑕᑎᒋᔭᐅᒋᐊᖃᕐᓂᐅᔪᖅ ᐱᑕᖃᖏᑦᑐᖅ ᐃᓱᒪᒋᔭᐅᓕᖅᑎᕈᓐᓇᓚᐅᕈᕕᒋᑦ ᐃᓚᖓᑦ ᐃᓱᒪᓕᐅᕆᔾᔪᑎᕕᑦ ᐅᕝᕙᓘᓐᓃᑦ ᑐᓴᕋᑦᓴᕕᑦ.

ᐅᑯᐊ ᐃᓚᖏᑦ ᒪᓕᒐᑎᒍᑦ ᐱᔾᔪᑎᐅᔪᑦ ᖃᓄᐃᒻᒪᑦ ᑭᐅᔪᓐᓇᖏᒻᒪᖔᖅᐱᑦ ᐊᐱᖅᑯᑎᒥᑦ.
  • ᖃᐅᔨᒪᖏᓐᓇᕕᐅᒃ ᑭᐅᔾᔪᑎᖓ.
  • ᐊᐱᖅᑯᑎᐅᔪᖅ ᐊᑦᑐᐊᓂᕋᖅᑐᖅ ᓱᓇᒥᑦ ᓯᓚᑖᓃᑦᑐᒥᑦ ᖃᐅᔨᒪᔭᖅᐱᑦ ᐅᕝᕙᓘᓐᓃᑦ ᐃᑉᐱᒋᔭᒐᖅᐱᑦ. ᐅᖃᐅᓯᐅᒻᒥᔪᖅ ᐃᒫᒃ “ᐊᖅᑯᑎᖓᓃᖏᓐᓇᕐᓂᖅ ᐃᕝᕕᑦ”.
  • ᐊᐱᖅᑯᑎᐅᔪᖅ ᐊᐱᕆᒻᒪᑦ ᐃᕝᕕᑦ ᐃᓱᒪᒋᔭᖏᓐᓂᑦ ᐅᖃᐅᓯᖃᖁᔭᐅᓗᑎᑦ ᑭᒡᒐᖅᑐᐃᑎᓪᓗᑎᑦ ᑲᑐᔾᔨᖃᑎᒌᒥᑦ, ᐃᓕᓐᓂᐅᖏᑦᑐᖅ.
  • ᐊᐱᖅᑯᑎᐅᔪᖅ ᐃᓕᓐᓂᒃ ᐅᖃᐅᓯᖃᖁᔨᔪᖅ ᒐᕙᒪᓕᕆᔾᔪᑎᐅᔪᒥᑦ. ᒐᕙᒪᓕᕆᓂᕐᒥᑦ ᐱᓕᕆᔨᐅᖏᒃᑯᕕᑦ ᖃᓄᑐᐃᓐᓇᖅ, ᓲᕐᓗ ᑭᒡᒐᖅᑐᐃᔨᐅᓂᖅ ᒐᕙᒪᓕᕆᔨᓂᑦ ᐅᕝᕙᓘᓐᓃᑦ ᐱᓕᕆᔨᐅᓂᖅ ᑲᑐᔾᔨᖃᑎᒌᓄᑦ ᐅᖃᐅᓯᖃᖅᐸᑦᑐᓂᑦ ᒐᕙᒪᓕᕆᔾᔪᑎᓂᑦ ᐃᓱᒪᒋᔭᕐᒥᓂᒃ, ᐊᑲᐅᓂᕐᓴᐅᔪᖅ ᐃᑉᐱᒋᖏᓯᐊᕐᒪᕆᓪᓗᒋᑦ ᒐᕙᒪᓕᕆᓂᐅᔪᑦ. ᐊᒻᒪᐃᓛᒃ, “ᐃᕝᕕᑦ ᐊᖅᑯᑎᖓᓃᖏᑉᐸᑦ” ᐊᑲᐅᓂᕐᓴᐅᕗᖅ ᑭᐅᖏᓯᐊᒻᒪᕆᓪᓗᑎᑦ.
  • ᐅᖃᐅᓯᖃᖅᑎᓪᓗᑎᑦ ᑐᑭᓯᒋᐊᕈᑎᓂᑦ ᑭᒃᑯᑐᐃᓐᓇᕐᓄᑦ ᖃᓄᐃᓕᐅᕆᑐᐃᓐᓇᕆᐊᖃᕋᕕᑦ ᐱᐅᖏᑐᒃᑯᑦ ᑭᓇᑐᐃᓐᓇᕐᒥᑦ ᐅᕝᕙᓘᓐᓃᑦ ᑲᑐᔾᔨᖃᑎᒌᓂᑦ ᖃᓄᑐᐃᓐᓇᖅ, ᓲᕐᓗ ᐃᒻᒥᓂᕐᓲᑎᖏᓐᓂᑦ, ᐊᑦᑕᓇᔾᔭᐃᒃᑯᑎᖏᓐᓂᑦ ᐅᕝᕙᓘᓐᓃᑦ ᖃᓄᐃᓕᐅᖅᑕᐅᒋᐊᖃᖏᓐᓂᖏᓐᓂᑦ.
  • ᓱᓇᑐᐃᓐᓇᕐᓂᒃ ᐃᖅᑲᖅᑐᐃᕕᓕᕆᔾᔪᑎᐅᔪᓂᑦ. ᐃᓚᖓᑦ ᐱᑐᐃᓐᓇᐅᖏᔾᔪᑎᐅᔪᖅ ᑭᒃᑯᑐᐃᓐᓇᕐᓄᑦ ᐃᖅᑲᖅᑐᐃᕕᓕᕆᖃᑕᐅᕙᑦᑐᓄᑦ ᐊᒻᒪ ᑐᓴᕋᑦᓴᓕᕆᔪᓄᑦ ᐊᐱᕐᓱᖅᑕᐅᔪᓄᑦ ᐱᓕᕆᔾᔪᑎᒋᒍᓂᐅᒃ.
  • ᑭᖑᓪᓕᖅᐹᖅ, ᑲᖐᓱᑐᐃᓐᓇᖅᑐᑦ ᐊᐱᖅᑯᑏᑦ ᐅᕝᕙᓘᓐᓃᑦ ᑕᐃᒃᑯᐊ ᐊᐱᖅᑯᑎᐅᔪᑦ ᐃᓕᓐᓂᒃ ᓇᓚᐅᑦᑖᖁᔨᔪᑦ.

ᐱᓪᓗᐊᑕᖏᓐᓂᑦ ᑎᑎᕋᕐᓯᒪᔪᑦ ᐋᖅᑭᑦᓱᐃᔪᓐᓇᕐᒥᔪᑎᑦ ᐳᐃᒍᕐᔭᐃᕐᓯᒪᕙᓪᓗᑎᑦ ᐅᖃᖅᑎᐅᓗᑎᑦ ᐃᒪᐃᒋᐊᖃᕋᕕᑦ “ᐃᓯᒐᑎᑦ ᓄᓇᒦᑏᓐᓇᕐᓗᒋᑦ”. ᓯᓚᑦᑑᒐᕕᑦ ᐅᖃᐅᓯᖃᕆᐊᑦᓴᖅ ᐊᑐᖅᑕᐅᔪᓂᑦ – ᐅᖃᐅᓯᖃᕆᐊᑦᓴᖅ ᐱᑕᖃᕐᓂᖏᓐᓂᑦ ᒫᓐᓇᐅᔪᖅ ᐊᒻᒪ ᓱᓇᐅᒻᒪᖔᑕ ᐊᑑᑎᖃᕐᓂᖏᑦ ᐱᓕᕆᐊᕆᕙᑦᑕᖏᓐᓄᑦ ᐃᕝᕕᑦ ᐊᒻᒪ ᑲᑐᔾᔨᖃᑎᒌᖁᑎᕕᑦ. ᐅᖃᖅᑎᐅᔪᑦ ᓴᖑᑎᑕᐅᒐᔪᒻᒪᑕ ᖃᓄᐃᓕᐅᕈᑎᖏᓐᓂᑦ – ᓱᓇᐅᓂᖏᓐᓂᑦ ᖃᕋᑕᐅᔭᖏᓐᓃᑦᑐᓂᑦ – ᐊᒻᒪ ᐃᒻᒥᓂᒃ ᐊᑐᓕᖅᑎᑦᓯᕙᑦᑐᑎᒃ ᓇᓗᓇᖅᑐᒻᒪᕆᐅᔪᓂᑦ ᐱᔾᔪᑎᐅᔪᓂᑦ ᐊᒻᒪ ᐃᓱᒪᒃᑯᑦ ᐋᔩᕈᑎᐅᔪᓐᓇᖅᑐᓂᑦ. ᓱᓕᑎᓇᓱᐊᕐᓯᒪᐃᓐᓇᕐᓗᒍ.

ᐊᓱᐃᓪᓛᒃ ᖃᓄᖅ ᑭᐅᒐᔭᖅᐱᑦ ᐊᐱᖅᑯᑎᒥᑦ ᑭᐅᔪᓐᓇᖏᑕᓐᓂᒃ ᐅᕝᕙᓘᓐᓃᑦ ᑭᐅᔭᕆᐊᖃᖏᑕᕐᓂᒃ?

ᑕᒪᓐᓇ ᑕᑎᒋᔭᓕᐅᖅᑏᑦ 1-2-3 ᒪᓕᒐᖓ. ᓯᕗᓪᓕᖅᐹᖅ ᓇᓗᓇᐃᕐᓯᓗᑎᑦ ᐱᕙᓪᓕᐊᔪᓕᕆᔨᒧᑦ ᑭᐅᔪᓐᓇᖏᓐᓇᕕᐅᒃ ᐊᐱᖅᑯᑎᖓ. ᐅᖃᕈᓐᓇᖅᑐᑎᑦ, “ᑭᐅᔪᓐᓇᖏᑕᕋ ᐊᐱᖅᑯᑎ” ᐅᕝᕙᓘᓐᓃᑦ “ᐅᖃᕈᓐᓇᖏᑕᕋ” ᐅᕝᕙᓘᓐᓃᑦ ᖃᓄᑐᐃᓐᓇᖅ ᐊᔾᔨᐸᓗᖏᓐᓂᑦ.

ᑐᓪᓕᐊ ᓇᓗᓇᐃᔭᐃᑦᓯᐊᕐᓂᖅ ᒪᓕᒐᑎᒍᑦ ᐱᔾᔪᑎᒋᔭᑎᒃ ᖃᓄᐃᒻᒪᑦ ᑭᐅᔪᓐᓇᖏᓂᕐᓂᒃ. ᐅᖃᕈᓐᓇᖅᑐᑎᑦ ᐃᒫᒃ, “ᐅᐱᓐᓇᕋᓂ ᐃᓗᐊᓃᖏᑦᑐᖅ ᖃᐅᔨᒪᔭᕐᒪᑦ” ᐅᕝᕙᓘᓐᓃᑦ “ᐃᓱᒪᒋᔪᓐᓇᖏᑕᕋ ᖃᓄᖅ”.

ᐱᓕᕆᐊᕆᒌᕈᕕᒋᒃ ᒪᕐᕉᒃ ᐊᑐᕆᐊᓖᑦ ᐃᓚᒋᔭᐅᔫᒃ, ᐅᖃᐅᓯᕆᔭᕇᖅᑕᐃᑦ ᐊᐱᖅᑯᑎᐅᔪᖅ. ᒫᓐᓇᐅᔪᖅ ᑕᑎᒋᔭᐅᒋᐊᓕᒻᒥᑦ ᐊᑐᕈᓐᓃᖅᑐᑎᑦ ᐱᓕᕆᐊᖃᕐᓂᒃᑯᑦ ᐃᓚᖓᓐᓂᒃ ᑐᓴᕋᑦᓴᓐᓂᒃ. ᖃᓄᐃᖏᓯᐊᖅᑐᖅ ᐃᓱᒪᓐᓂᕈᕕᑦ ᐱᖃᓯᐅᔾᔨᒐᕕᐅᒃ ᑐᓴᕋᑦᓴᐃᑦ ᐅᖃᐅᓯᕆᒐᓱᐊᒡᒐᖅᑐᒍ ᐅᕝᕙᓘᓐᓃᑦ ᐱᑦᓯᐊᕐᓇᒍ ᐅᖃᐅᓯᕆᓪᓗᒍ. ᓯᕗᒧᐊᑦᓯᐊᖅᑐᑯᓗᒻᒥᑦ ᐅᖃᐅᓯᖃᕆᐊᑐᖏᑦᑐᑎᑦ.
ᐱᖓᔪᐊᑦ ᐊᑐᕈᓐᓇᕐᓯᔭᐃᑦ 1-2-3 ᒪᓕᒐᕗᑦ. ᐅᖃᕈᓐᓇᖅᑐᑎᑦ, “ᑭᓯᐊᓂ ᐃᒫᒃ ᐅᖃᕈᓐᓇᕋᓗᐊᖅᑐᖓ...” ᐅᕝᕙᓘᓐᓃᑦ “ᐃᒪᐃᓕᐅᖅᐸᑦᑐᒍᑦ...” ᐅᕝᕙᓘᓐᓃᑦ “ᒫᓐᓇᐅᔪᖅ ᐊᑐᖅᑕᐅᔪᖅ ᐅᓇ...” ᐊᒻᒪ ᐅᖃᐅᓯᖃᓕᕐᓗᑎᑦ ᑐᓴᕋᑦᓴᒥᑦ.

ᐃᓚᖓᑦ 3: ᐊᐱᖅᑯᑏᑦ ᑭᐅᔪᓐᓇᖅᑕᑎᑦ

ᐊᓯᐊ ᑕᑯᓐᓇᖕᖑᐊᒐᐅᔪᖅ ᑭᐅᔪᓐᓇᕋᕕᐅᒃ ᐊᐱᖅᑯᑎᐅᔪᖅ.

  ᐃᓚᖏᑦ ᒐᕙᒪᓕᕆᔨᐅᔪᑦ ᐅᕝᕙᓘᓐᓃᑦ ᐅᐃᒻᒪᐃᔨᐅᔪᑦ ᓗᑦᑖᑦ ᑕᒻᒪᕈᑎᒋᒐᔪᑦᑕᖏᑦ ᐱᓕᕆᖃᑐᐃᓐᓇᐸᒻᒪᑕ ᑐᓴᕋᑦᓴᒧᑦ ᐊᒻᒪ ᐅᖃᐅᓯᖃᕋᑎᒃ ᐊᐱᖅᑯᑎᐅᔪᓂᑦ.

ᖃᐅᔨᒪᔨᑕᐅᔪᑦ ᐊᒻᒪ ᑲᑐᔾᔨᖃᑎᒌᓄᑦ ᐅᖃᖅᑎᐅᔪᑦ ᑕᒻᒪᕋᔪᑦᑐᑦ ᐃᓗᐊᓄᖔᖅ – ᐅᖃᐅᓯᖃᖅᐸᑦᑐᑦ ᐊᐱᖅᑯᑏᓐᓇᕐᒥᒃ – ᐱᓕᕆᐊᖃᖅᐸᖏᑦᑐᑦ ᑐᑭᖃᕋᓱᑦᑐᑎᒃ ᐅᕝᕙᓘᓐᓃᑦ ᐃᓗᓕᖏᓐᓂᑦ. ᐊᓯᐊᒍᑦ ᐅᖃᖅᑐᓂ, ᐱᖃᓯᐅᔾᔨᓯᒪᕙᖏᑦᑐᑦ ᑐᓴᕋᑦᓴᒥᑦ.
ᐊᐱᖅᑯᑎᓕᕆᔪᒥᑦ ᑕᑯᑦᓴᐅᑎᑦᓯᓇᓱᐊᖅᑑᔮᓕᕈᓐᓇᖅᑐᑦ ᐊᐱᕐᓱᖅᑎᐅᔪᖅ ᓱᑲᑦᑐᐊᓘᓗᓂ ᐊᐱᖅᑯᓂᑦ ᐅᖃᐅᓯᖃᖅᐸᑎᓪᓗᒍ ᐅᖃᖅᑎᒧᑦ “ᐅᖃᐅᓯᖃᖅᐸᑦᑐᒥᑦ” ᓱᓕᔪᓂᑦ ᐱᓕᕆᔾᔪᑎᓂᑦ. ᐊᐱᕐᓱᖅᑎᐅᔪᖅ ᐊᐅᓚᑦᓯᔪᖅ ᖃᓄᐃᓕᐅᕈᑎᖏᓐᓂᑦ ᐊᒻᒪ ᐅᖃᖅᑎ ᐱᓕᕆᔾᔪᑎᓂᑦ ᒪᓕᑦᑐᓂ ᑭᐅᕙᑦᑐᖅ.

ᑕᒪᓐᓇ ᐊᑐᖅᑕᐅᔪᓐᓇᖅᑑᒐᓗᐊᖅ ᐅᖃᖅᑎᓄᑦ ᐊᓯᐅᒐᔪᑦᑐᖅ – ᑐᓴᖅᑎᑦᓯᕙᑦᑐᑦ ᑐᑭᓯᒋᐊᕈᑎᖏᓐᓂᑦ ᑐᑦᓯᕌᓂᑦ ᐊᒻᒪ ᐳᐃᒍᐃᕙᑦᑐᑎᒃ ᐱᖃᓯᐅᔾᔨᔭᕆᐊᑦᓴᖅ ᑐᓴᕋᑦᓴᒥᑦ ᐅᕝᕙᓘᓐᓃᑦ ᐃᓱᒪᓕᐅᕆᔾᔪᑎᒥᑦ ᑐᑭᓯᔭᐅᖁᔭᐅᔪᒥᑦ ᑐᓴᐅᒪᑎᑕᐅᒍᒪᔪᓄᑦ.
ᑕᐃᒫᑦᑕᐅᖅ 1-2-3 ᒪᓕᒐᑎᑐᑦ, ᐅᖃᐅᓯᕆᓯᒪᑐᐊᓕᕋᕕᐅᒃ ᐊᐱᖅᑯᑎ – ᑕᕝᕙᓂ ᑭᐅᓪᓗᒍ – ᐱᓕᕆᐊᕆᔪᓐᓇᖅᑕᐃᑦ ᑐᓴᕋᑦᓴᖅ, ᐃᓱᒪᒐᓗᐊᕈᕕᑦ ᐊᔪᐃᓐᓈᖑᓂᕐᓂᒃ ᐅᕝᕙᓘᓐᓃᑦ ᐱᑦᓯᐊᖏᓐᓂᖓᓂᑦ.

ᓲᕐᓗ, ᑭᐅᔾᔪᑎᒋᓪᓗᒍ ᐊᐱᖅᑯᑎᓄᑦ “ᖃᓄᖅ ᐊᑭᖃᖅᐸ ᐱᓕᕆᐊᑦᓴᖅ”, ᐅᖃᖅᑎ ᐅᖃᕈᒪᑐᐃᓐᓇᕆᐊᓕᒃ ᓱᓕᔪᒥᑦ ᑭᓯᐊᓂ ᑭᐅᔾᔪᑎᒥᑦ ᓲᕐᓗ “$5 ᒥᓕᐊᓐ ᑮᓇᐅᔭᐃᑦ” ᐊᒻᒪ ᐅᖃᒃᑲᓂᖏᓪᓗᑎᒃ ᐊᓯᐊᓂᑦ. ᐱᐅᔪᒥᑦ ᐃᑉᐱᒍᓱᓐᓇᖅᑐᖅ! ᐅᖃᐅᓯᖃᖅᑐᑎᑦ ᓱᓕᔪᒥᑦ ᑭᐅᔾᔪᑎᒥᑦ ᐊᒻᒪ ᐊᓐᓇᐅᒪᓪᓗᑎᑦ ᐊᓯᐊᓂᑦ ᐊᐱᖅᑯᑎᒥᑦ. ᑭᓯᐊᓂ ᐳᐃᒍᕐᓯᒪᔪᑎᑦ ᐱᓕᕆᐊᕆᔭᕆᐊᖓ ᑐᓴᕋᑦᓴᐅᑉ ᐃᓗᓕᖏᑦ. ᐊᓱᐃᓪᓛᒃ, ᐅᖃᕈᓐᓇᖅᐳᑎᑦ ᐃᒫᒃ, “ᐱᓕᕆᐊᑦᓴᖅ ᐊᑭᖃᖅᑐᖅ $5 ᒥᓕᐊᓂᑦ ᐊᒻᒪ ᓴᓇᔭᐅᓯᒪᔪᖅ ᐃᑲᔫᑎᐅᔪᒪᓗᓂ ᑭᒃᑯᑐᐃᓐᓇᕐᓂᑦ ᐅᑯᓅᓇ ...”.

ᐅᖃᐅᓯᕆᒌᑐᐊᕈᕕᐅᒃ ᐊᐱᖅᑯᑎ – ᑭᐅᓪᓗᒍ ᐅᕝᕙᓘᓐᓃᑦ ᐅᖃᐅᓯᕆᒋᐊᒃᑲᓐᓂᖅᑐᒍ ᖃᓄᐃᒻᒪᑦ ᑭᐅᔪᓐᓇᖏᒻᒪᖔᖅᐱᐅᒃ – ᐊᑲᐅᓈᕈᑎᒋᔪᓐᓇᕋᔭᖅᑕᐃᑦ ᐅᖃᐅᓯᖃᕐᓂᒃᑯᑦ ᑐᓴᐅᒪᑎᒍᒪᔭᑎᑦ ᖃᓄᖅ ᑐᑭᓯᓯᒪᖁᒻᒪᖔᖅᐱᒋᑦ.

ᐳᐃᒍᖅᑕᐃᓕᒋᑦ, ᑐᓴᐅᒪᑎᑦᓯᓕᕆᓂᕐᒥᑦ ᐱᖕᖑᐊᖑᖏᒻᒪᑦ ᐅᖃᐅᓯᖃᒐᓚᑐᐃᓐᓇᓂᕐᒥᑦ – ᐃᓘᓐᓇᑦᓯᐊᑎᒃ ᓇᓗᓇᐃᕐᓯᒪᑦᓯᐊᖅᑐᑦ. ᐱᕙᓪᓕᐊᔪᓕᕆᔨ ᐊᒻᒪ ᑐᓴᐅᒪᖁᔭᖏᑦ ᖃᐅᔨᒪᔪᑦ ᐃᓱᒪᓕᐅᕆᔾᔪᑎᖃᕐᓂᕐᓂᒃ ᐅᕝᕙᓘᓐᓃᑦ ᑐᓴᕋᑦᓴᖃᕐᓂᕐᓂᒃ ᑐᑭᓯᔭᐅᖁᔭᕐᓂᒃ. ᐅᖃᐅᓯᕆᓚᐅᑐᐊᕈᕕᐅᒃ ᐊᐱᖅᑯᑎᐅᔪᖅ, ᐅᖃᐅᓯᕆᔪᓐᓇᖅᑕᑎᑦ ᑕᐃᒃᑯᐊ ᐃᓱᒪᓕᐅᕆᔾᔪᑎᐅᔪᑦ. ᓇᓗᓇᐃᕈᓐᓇᖅᑕᑎᑦ ᐊᓪᓛᑦ ᑐᓴᕋᑦᓴᐅᓗᑎᒃ ᐅᖃᕐᓗᑎᒃ ᐃᒪᐃᑦᑐᒐᓚᒻᒥᑦ, “ᐱᓕᕆᐊᑦᓴᖅ ᐊᑭᖃᖅᑐᖅ $5 ᒥᓕᐊᓂᑦ ᑮᓇᐅᔭᓂᑦ, ᓴᓇᔭᐅᓯᒪᔪᖅ ᐃᒪᐃᓕᐅᕈᓐᓇᖁᔭᐅᓗᓂ X, Y, ᐊᒻᒪ Z, ᐊᒻᒪ ᑐᓴᕋᑦᓴᓪᓗᐊᑕᐅᔪᖅ ᑐᓴᖅᑕᐅᖁᔭᕗᑦ ᑭᒃᑯᑐᐃᓐᓇᕐᓄᑦ ᐅᓇ...”.

ᑭᖑᓪᓕᖅᐹᒥ, ᑕᒻᒪᖅᑕᐅᒐᔪᑦᑐᑦ ᖃᐅᔨᒪᔨᑕᓄᑦ ᐊᒻᒪ ᐅᖃᖅᑎᓄᑦ ᐱᓕᕆᐊᖃᕋᓱᐊᖅᐸᓐᓂᖏᑦ ᐃᓘᓐᓇᖏᓐᓂᑦ ᐅᐸᓗᖓᐃᔭᕐᓯᒪᔭᕐᒥᓂᒃ ᐃᓱᒪᓕᐅᕈᑎᓂ ᐊᒻᒪ ᑐᓴᕋᑦᓴᓂ ᓯᕗᓪᓕᖅᐹᒥ ᑭᐅᔾᔪᑎᖓᓐᓂ. ᑭᐅᔾᔪᑎᐅᔪᖅ ᑕᑭᓗᐊᓕᕈᓐᓇᖅᑐᖅ ᐊᒻᒪ ᑐᕌᒐᖃᓗᐊᖏᓪᓗᓂ. ᐱᓕᕆᔾᔪᑎᑦᓯᐊᕙᐅᔪᖅ ᐅᓇ “ᐊᒡᒍᑎᕐᓗᒋᑦ” ᑐᑭᓯᒋᐊᕈᑎᒋᔭᑎᑦ ᐊᑕᐅᓯᐅᖏᑦᑐᒧᑦ ᑭᐅᔾᔪᑎᒧᑦ.
ᑕᒪᓐᓇ ᐊᑐᕈᓐᓇᖅᑕᐃᑦ ᐊᒻᒪ ᐊᐅᓚᑎᓪᓗᒍ ᓇᒧᖓᕐᓂᐊᕐᓂᖓ ᐊᐱᕐᓱᕐᓂᐅᔫᑉ ᐃᓕᓯᓗᓂ “ᓂᑦᓯᒻᒥᑦ” ᐃᓱᐊᓄᑦ ᑭᐅᔾᔪᑎᕕᑦ ᓲᕐᓗ ᐃᒪᐃᓕᖓᓗᒍ, “ᐱᓕᕆᐊᑦᓴᖅ ᐊᑭᖃᖅᑐᖅ $5 ᒥᓕᐊᓂᑦ ᑮᓇᐅᔭᓂᑦ, ᓴᓇᔭᐅᓯᒪᓪᓗᓂ ᐃᒪᐃᓕᐅᕈᓐᓇᖁᓪᓗᒍ X, Y, ᐊᒻᒪ Z – ᑭᓯᐊᓂ ᐊᖏᓛᖑᖏᓯᐊᖅᑐᖅ ᑮᓇᐅᔭᐃᔭᐅᑎᒋᓯᒪᔭᖅᑎᓐᓂ ᑕᒪᑦᓱᒥᖓ ᑲᒪᒋᑦᑐᑎᒋᓪᓗᒋᑦ ᐱᔾᔪᑎᐅᔪᒥᑦ.” ᐱᕙᓪᓕᐊᔪᓕᕆᔨᐅᔪᖅ ᐊᐱᕆᔪᒪᓕᕋᔭᖅᑐᖅ ᖃᐅᔨᒃᑲᓐᓂᕈᒪᓗᓂ ᐊᐱᕆᓗᓂ “ᓱᓇᐅᒻᒪᑦ ᐊᖏᓛᖑᔪᖅ ᑮᓇᐅᔭᐃᔭᐅᑎᐅᔪᖅ?” ᑕᕝᕙᓕ ᐊᐅᓚᑎᓕᖅᐸᐃᑦ ᓇᒧᑦ ᐃᖏᕐᕋᓂᖓ ᐊᐱᕐᓱᕐᓂᐅᔫᑉ, ᑭᐅᒫᑐᐃᓐᓇᕐᓇᑎᑦ ᑭᐅᒫᔪᖅᑎᑐᑦ ᐊᐱᖅᑯᑎᓕᕆᔪᓂᑦ ᑕᑯᑦᓴᐅᑎᑦᓯᔪᖅᑎᑐᑦ.

ᐅᕙᓂ ᐃᓕᓐᓂᐊᕈᑎᒥ ᐅᖃᐅᓯᖃᖅᐸᑦᑐᒍᑦ ᓇᓗᓇᐃᔭᐃᓂᖅ ᐊᒻᒪ ᐅᖃᐅᓯᖃᕐᓂᖅ ᐊᐱᖅᑯᑎᒥᑦ. ᑕᑯᒋᐊᕐᓯᒪᔪᒍᑦ ᖃᖓᒃᑯᑦ ᑭᐅᔪᓐᓇᖏᒻᒪᖔᖅᐱᑦ ᐊᒻᒪ ᑭᐅᔪᓐᓇᕋᐃᒐᕕᑦ, ᐱᓕᕆᔾᔪᑎᒋᓕᖅᑐᒋᑦ ᑐᓴᕋᑦᓴᐅᔪᑦ ᓯᕗᒧᐊᑉᐸᓪᓕᐊᓂᕐᓂ.
ᐳᐃᒍᖅᑕᐃᓕᒋᑦ, ᑐᓴᖅᑎᓇᓱᐊᖅᑕᑎᑦ ᑐᑭᓯᐊᒋᐊᓕᐅᔪᑦ ᐃᓱᒪᓕᐅᕈᑎᒋᔭᕐᓂᒃ, ᓴᖅᑭᔮᕈᑎᖃᑐᐃᓐᓇᖏᓪᓗᑎᒃ ᐊᑐᖅᑕᐅᔪᓂᑦ ᐊᒻᒪ ᐱᓕᕆᔾᔪᑎᐅᔪᓂᑦ.
Last modified: Friday, 1 November 2024, 4:47 PM