ᑎᑎᕋᖅᓯᒪᔪᑦ - ᑐᓴᕋᑦᓴᑦ ᐊᒻᒪ ᐃᓱᒪᓕᐅᕆᔾᔪᑏᑦ (transcript)

ᑐᓴᕋᑦᓴᑦ ᐊᒻᒪ ᐃᓱᒪᓕᐅᕆᔾᔪᑏᑦ

ᐃᓚᖓ 1: ᑐᓴᐅᒪᑎᑦᓯᔨᓄᑦ ᑭᐅᔾᔪᑎᐅᕙᑦᑐᑦ ᐅᖃᐅᓰᑦ

ᐃᓛᓐᓂᒃᑯᑦ ᑲᑐᔾᔨᖃᑎᒌᖑᔪᑦ ᐅᐸᓗᖓᐃᔭᐃᕙᒌᕐᓯᒪᕙᑦᑐᑦ ᑐᑭᓯᒋᐊᕈᑎᑦᓴᓂᑦ ᓂᕆᐅᒋᔭᒥᓂᒃ ᐅᖃᖅᑎᐅᑉ ᐅᖃᐅᓯᕆᓂᐊᕐᓂᖏᓐᓂᑦ ᐅᕝᕙᓘᓐᓃᑦ ᐅᖃᓕᒫᕐᓂᐊᕐᓂᖏᓐᓂᑦ ᑐᓴᐅᒪᔭᐅᒋᐊᓕᓐᓂᑦ ᐱᔾᔪᑎᖃᖅᑐᑎᒃ ᐊᐱᕐᓱᑕᐅᓗᑎᒃ. ᑭᓯᐊᓂᓕ, ᑭᐅᔾᔪᑎᐅᔪᑦ ᐱᕙᓪᓕᐊᔪᓕᕆᔨᒥᑦ ᐊᒻᒪ ᑐᓴᖅᑎᑕᐅᓇᓱᐊᖅᑐᓂᑦ ᑐᓴᕋᑦᓴᐅᑉ ᓴᖅᑭᖅᑕᐅᓂᖓᓄᑦ ᐱᐅᖏᑦᑑᒐᔪᑦᑐᑦ.

ᐱᔾᔪᑎᖃᖅᐸᑦᑐᑦ ᑭᒃᑯᑐᐃᓐᓇᐃᑦ ᖃᐅᔨᒪᒍᑎᒃ ᐅᖃᓕᒫᕐᒪᖔᖅᐱᑦ ᐅᕝᕙᓘᓐᓃᑦ ᐅᖃᐅᓯᖃᕐᒪᖔᖅᐱ, ᐊᒻᒪ ᐱᐅᖏᑦᑐᓂᑦ ᐃᓱᒪᒋᔭᖃᓕᖅᐸᑦᑐᑦ ᐊᑐᕐᓂᕐᓂᒃ ᖃᓄᐃᒻᒪᑦ ᑕᐃᒪᐃᓕᐅᕈᑎᖃᑦᑕᕐᒪᖔᖅᐱᑦ. ᐃᓱᒪᒐᔪᒻᒪᑕ ᐅᖃᐅᓯᐅᖁᔭᐅᔪᓂᑦ ᐅᖃᐅᓯᖃᕐᓂᕐᓂᒃ ᐅᐱᓐᓇᕋᓂ ᖃᐅᔨᒪᖏᓐᓇᕕᑦ ᓱᓇᒥᑦ ᐅᖃᐅᓯᖃᕐᒪᖔᖅᐱᑦ, ᐅᕝᕙᓘᓐᓃᑦ, ᐱᐅᖏᓂᕐᓴᒻᒪᕆᒃ, ᐃᔨᕐᓯᒪᑦᓯᒐᕕᑦ ᓱᓇᒥᑦ.

ᑐᓴᕋᑦᓴᓕᕆᔨᓄᑦ ᐅᖃᐅᓯᐅᔪᑦ ᐊᑑᑎᖃᕈᓐᓇᓯᐊᕐᒥᔪᑦ. ᐃᒪᐃᑦᑑᒻᒪᑕ, ᓲᕐᓗ, ᓇᐃᓈᕐᓯᒪᓪᓗᑎᒃ ᖃᐅᔨᒪᐅᑎᒋᔭᖏᑦ ᐅᖃᖅᑎᐅᔪᑦ. ᐋᖅᑭᑦᓱᐃᔾᔪᑎᐅᔪᑦ ᐃᓗᓕᑦᓴᖏᓐᓂᑦ, ᐃᓱᒪᓕᐅᕆᔾᔪᑎᖏᓐᓂᑦ ᐊᒻᒪ ᐊᓯᖏᓐᓄᑦ ᐊᑑᑎᖃᖅᑐᒻᒪᕆᓐᓄᑦ ᑐᑭᓯᒋᐊᕈᑎᓄᑦ ᐃᓕᓐᓂᒃ ᐃᑲᔫᑎᒋᔪᓐᓇᖅᑕᖏᓐᓂᑦ ᐊᐅᓚᑦᓯᓂᒃᑯᑦ ᑐᓴᕋᑦᓴᓕᕆᓂᕐᒥᑦ ᐊᐱᕐᓲᑎᑦᓴᓂᑦ.

ᑭᓯᐊᓂ ᑎᑎᕋᕐᓯᒪᔪᑦ ᑎᑎᖅᑲᐃᑦ. ᐃᒪᐃᑦᓴᕆᐊᖃᕐᒪᑦ ᑕᐃᓐᓇ ᑎᒍᓗᒍ ᑐᑭᓯᒋᐊᕈᑎᐅᔪᖅ ᒪᑉᐱᒐᕐᒦᑦᑐᖅ, ᐃᕝᕕᑦ ᐃᓱᒪᖓᓅᕐᓗᒍ ᐃᖅᑲᐅᒪᓕᐊᕋᕕᐅᒃ ᐊᒻᒪ ᐅᖃᐅᓯᕆᓂᐊᕋᕕᐅᒃ ᖃᐅᔨᒪᐃᓐᓇᖅᑕᒥᓂᕆᔫᔮᕐᓗᒍ ᐊᒻᒪ ᐱᕙᓪᓕᐅᑎᑦᓯᐊᑐᒃᑯᑦ ᖃᓄᐃᓕᐅᕈᑎᒻᒪᕆᐅᔪᒦᓕᕈᕕᑦ ᓲᕐᓗ ᑐᓴᕋᑦᓴᓕᕆᓂᒃᑯᑦ ᐊᐱᕐᓱᖅᑕᐅᑎᓪᓗᑎᑦ.

ᑕᕝᕙ ᑕᒫᓂ ᑕᑎᑦᓴᓂᕐᒥᑦ ᓴᓇᔩᑦ (TRUSTMAKERS) ᑐᓴᕋᑦᓴᖏᓐᓄᑦ ᐱᓕᕆᔾᔪᑎᖓᑦ ᐊᑐᖅᑕᐅᓕᖅᐸᑦᑐᖅ.

ᑕᑎᑦᓴᓂᕐᒥᑦ ᓴᓇᔩᑦ (TRUSTMAKERS) ᑐᓴᕋᑦᓴᖏᓐᓄᑦ ᐱᓕᕆᔾᔪᑎᖓᑦ

ᐱᓕᕆᔾᔪᑎᐅᔪᖅ ᐱᒋᐊᕈᑎᖃᖅᑐᖅ ᖃᓄᖅ ᐱᕙᓪᓕᐊᔪᓕᕆᔨᐅᔪᑦ ᑐᓴᕋᑦᓴᓂᑦ ᓴᓇᕙᒻᒪᖔᑕ ᐅᓂᒃᑳᓕᐊᒥᓂᒃ. ᐃᓘᓐᓇᐸᓗᖏᓐᓂ ᐱᕙᓪᓕᐊᔪᓂᑦ ᐅᓂᒃᑳᓕᐊᖑᕙᑦᑐᓂ, ᐱᕙᓪᓕᐊᔪᓕᕆᔨ ᐅᑯᓂᖓ ᐱᖓᓱᓂᑦ (3) ᐃᓱᒪᓕᐅᕆᔾᔪᑎᓂᑦ ᓇᓗᓇᐃᔭᐃᕙᑦᑐᖅ:

ᖃᓄᐃᓕᐅᖅᑐᖃᕐᒪᑦ?

ᖃᓄᐃᒻᒪᑦ ᐊᑐᖅᑕᐅᕙ?

ᑭᒃᑯᓐᓂᑦ ᐊᑦᑐᐃᕙ?

ᑕᑎᑦᓴᓂᕐᒥᑦ ᓴᓇᔩᑦ (Trustmakers) ᑐᓴᕋᑦᓴᖏᓐᓄᑦ ᐱᓕᕆᔾᔪᑎᖓᑦ ᑖᒃᑯᓂᖓᑦᓴᐃᓐᓇᖅ ᐱᓯᒪᔪᑦ ᐱᖓᓱᓂᑦ (3) ᐃᓱᒪᓕᐅᕆᔾᔪᑎᓂᑦ ᖃᐅᔨᒪᔭᑦᑎᓐᓂᑦ ᐱᕙᓪᓕᐊᔪᓕᕆᔨᐅᑉ ᐅᖃᐅᓯᕆᓂᐊᖅᑕᖏᓐᓂᑦ ᐊᑐᓂ ᐅᓂᒃᑳᓕᐊᖏᓐᓂ.

ᐃᓱᒪᓕᐅᕆᕗᒍᑦ ᐅᖃᖅᑎᐅᔪᖅ ᑐᓴᕋᑦᓴᓕᕆᓂᐊᕐᓗᓂ ᐊᐱᕐᓱᓂᕐᒧᑦ ᐃᓱᒪᒋᔭᖃᕐᓗᓂ ᐱᖓᓱᓂᑦ (3) ᐃᓱᒪᓕᐅᕆᔾᔪᑎᓂᑦ ᐳᐃᒍᔾᔭᐃᕐᓯᒪᕙᓪᓗᒋᑦ. ᐊᑕᐅᓯᖅ (1) ᓇᓗᓇᐃᔭᐃᔪᖅ ᖃᓄᐃᓕᐅᕐᒪᖔᖅᐱᑦ, ᐅᕝᕙᓘᓐᓃᑦ ᐊᐅᓚᔾᔭᐃᔨ ᑐᓴᕋᑦᓴᖅ. ᑐᓪᓕᐊ ᐃᓱᒪᓕᐅᕆᔾᔪᑎᐅᑉ ᐱᔾᔪᑎᖃᖅᑐᖅ ᐱᔾᔪᑎᖓᓂᑦ ᑕᐃᑦᓱᒪ ᐊᐅᓚᔾᔭᐃᔨᐅᑉ, ᐅᕝᕙᓘᓐᓃᑦ ᐱᔾᔪᑎᖏᑦ ᑐᓴᕋᑦᓴᓕᐊᕕᑦ. ᐱᖓᔪᐊᑦ ᐃᓱᒪᓕᐅᕆᔾᔪᑎ ᐱᔾᔪᑎᖃᖅᑐᖅ ᖃᓄᖅ ᑕᐃᓐᓇ ᐊᐅᓚᔾᔭᐃᔾᔪᑎᐅᔫᑉ ᐊᑦᑐᐃᓂᖃᕐᓂᖓ ᑭᒃᑯᑐᐃᓐᓇᕐᓂᑦ, ᐅᕝᕙᓘᓐᓃᑦ ᐊᓯᕕᑦ ᐃᑉᐱᒋᔭᖏᓐᓂᑦ ᐃᑉᐱᓐᓂᐊᓂᕐᒥᑦ ᑐᓴᕋᑦᓴᖅ.

ᐃᖅᑲᐅᒪᒋᐊᓖᑦ

ᐅᑯᐊ ᐊᒥᓲᖏᑦᑐᑦ ᐳᐃᒍᕐᔭᐃᕐᓯᒪᒋᐊᓕᑦᑎᑦ:

ᑕᒪᒃᑯᐊ ᐱᔭᕆᐊᑭᑦᑐᑯᓗᐃᑦ ᑐᓴᕋᑦᓴᐃᑦ ᐱᖃᓯᐅᔾᔨᓯᒪᕙᖏᑦᑐᑦ ᐃᓘᓐᓇᖏᓐᓂᑦ ᐅᖃᐅᓯᕆᓂᐊᖅᑕᖏᓐᓂᑦ ᐃᕝᕕᑦ. ᐃᓱᒪᓕᐅᕆᔾᔪᑎᑐᐃᓐᓇᐅᔪᑦ ᐅᖃᐅᓯᕆᒐᓱᑦᑕᓐᓂᑦ. ᐆᑦᑑᑎᖃᕐᓂᐊᖅᑐᑎᑦ ᐊᒻᒪ ᐊᓯᖏᓐᓂᑦ ᑐᑭᓯᒋᐊᕈᑎᓂᑦ ᖃᐅᔨᒪᔭᖃᕐᓗᑎᑦ ᐃᑲᔫᑎᑦᓴᐅᔪᓂᑦ ᑐᓴᕋᑦᓴᖏᓐᓄᑦ ᐃᕝᕕᑦ ᑭᓯᐊᓂ ᑐᓴᕋᑦᓴᐃᑦ ᑐᑭᓯᒐᑦᓴᐅᓯᐊᖅᑐᑦ, ᐅᖃᐅᓯᑦᑕᖏᖅᑲᐃ 12-ᓗᑎᒃ ᐅᕝᕙᓘᓐᓃᑦ ᕿᓚᒥᕈᓗᒃ ᐅᖃᐅᓯᕆᔪᓐᓇᕐᓗᒋᑦ ᐅᖃᐅᓯᕆᒍᕕᒋᑦ. ᐱᔭᕆᐊᑐᒋᓗᐊᕈᕕᐅᒃ ᑕᒪᒃᑯᐊ ᐃᓗᐊᓃᔭᕆᐊᑦᓴᖅ ᑭᓪᓕᒋᔭᐅᔪᑦ, ᐃᓱᒪᓕᐅᕆᔾᔪᑏᖅᑲᐃ ᓇᓗᓇᓗᐊᖅᑐᑦ ᐃᓗᓕᖏᑦ – ᑐᑭᓯᓇᖅᑎᒋᐊᕋᓱᓕᒃᑭᑦ.

ᐱᖓᓱᐃᑦ (3) ᑐᓴᕋᑦᓴᐃᑦ ᐊᑐᓃᓕᖓᔪᑦ ᑲᑎᖕᖓᖏᑦᑐᑦ ᐊᒻᒪ ᐋᖅᑭᑦᓯᒪᖏᓪᓗᑎᒃ ᓴᖅᑭᖅᑕᐅᒐᔭᖅᑐᑦ.
 ᐊᑐᕋᔭᖕᖑᐊᖅᑐᑎᑦ ᐊᑕᐅᓯᕐᒥᑦ (1) ᐅᕝᕙᓘᓐᓃᑦ ᒪᕐᕉᓐᓂᒃ (2) ᐊᑐᓂ ᑭᐅᔾᔪᑎᓐᓂ, ᒪᓕᑦᑐᒍ ᖃᓄᐃᑦᑑᓂᖓ ᐊᐱᖅᑯᑎᐅᑉ.

ᐃᓚᖓ 2: ᐱᕙᓪᓕᐅᑎᔾᔪᑎᖏᑦ ᐱᓕᕆᔾᔪᑎᐅᑉ

ᐱᖓᓱᐃᖑᔪᑦ ᐱᕙᓪᓕᐅᑎᔾᔪᑎᒋᔪᓐᓇᖅᑕᖏᑦ ᐆᒪ ᐱᓕᕆᔾᔪᑎᐅᑉ.

ᓯᕗᓪᓕᖅᐹᒥ ᐃᑲᔫᑎᒋᔪᓐᓇᖅᑕᑎᑦ ᐳᐃᒍᔾᔭᐃᒃᑯᑎᒋᓗᒋᑦ ᓱᓇᐅᒻᒪᖔᑕ ᑲᑐᔾᔨᖃᑎᒌᑦᓯᓐᓂ ᐱᓕᕆᔾᔪᑎᒍᑦ ᑐᓴᐅᒪᑎᑦᓯᔾᔪᑎᒍᑦ ᑭᐅᔾᔪᑎᓕᕆᔾᔪᑎᖏᓐᓂᑦ ᐱᓯᒪᒍᕕᒋᑦ. ᖃᓄᐃᓕᐅᕈᑎᖓ, ᐱᔾᔪᑎᖓ ᐊᒻᒪ ᐃᑉᐱᓐᓂᐊᒍᓐᓇᓂᕐᒥᑦ ᐊᓯᒥᑕ ᐊᑐᖅᑕᖏᓐᓂᑦ ᐃᓱᒪᓕᐅᕆᔾᔪᑎᑦᓴᑦ ᑕᑯᔭᑦᓴᐅᑲᓴᑦᓯᐊᖅᑐᑦ ᑕᒪᒃᑯᓇᓂ ᑐᓴᐅᒪᐅᑎᓕᕆᔾᔪᑎᓂᑦ – ᐃᓚᖃᖅᑐᑎᒃ ᐊᓯᖏᓐᓂᒃ ᐊᑐᖅᑕᐅᓯᒪᔪᓂᑦ ᐊᒻᒪ ᐃᓗᓕᖏᑕ ᑐᑭᓯᒋᐊᕈᑎᖏᓐᓂᑦ. ᑖᒃᑯᐊ ᐱᖓᓱᑦ ᐱᔭᕆᐊᑭᑦᑐᑯᓗᐃᑦ ᐃᓱᒪᓕᐅᕆᔾᔪᑎᑦᓴᑦ ᐊᑐᖅᑕᐅᔪᓐᓇᖅᑐᑦ ᐳᐃᒍᔾᔭᐃᒃᑯᑎᐅᕙᓪᓗᑎᒃ, ᐃᓕᓐᓂᒃ ᐃᑲᔫᑎᒋᕙᓪᓗᒋᑦ ᐳᐃᒍᔾᔭᐃᒃᑯᑎᒋᕙᓪᓗᒋᑦ ᑕᐃᒃᑯᓂᖓ ᐊᓯᖏᓐᓂᑦ ᑐᑭᓯᒋᐊᕈᑎᐅᔪᓂᑦ ᑭᐅᔾᔪᑎᓃᑦᑐᓂᑦ ᐳᐃᒍᔾᔭᐃᕐᓯᒪᓇᓱᓐᓂᒃᑯᑦ ᐅᖃᐅᓯᕆᓕᖅᑭᑦᑖᕙᖏᓪᓗᒋᑦ.

ᑐᓪᓕᐊ ᐃᑲᔫᑎᐅᔪᓐᓇᖅᑐᖅ ᑕᑯᓐᓇᖅᑕᐅᑎᑦᓯᒍᓐᓇᕐᒪᑕ ᐃᕝᕕᑦ ᑭᐅᔾᔪᑎᖏᓐᓂᑦ. ᐱᔭᕆᐊᑐᔪᕈᓘᒻᒪᑦ ᖃᓄᖅ ᐅᖃᕋᓱᑦᑐᓂᑦ ᐅᖃᐅᑎᑦᓴᖃᕋᓂ ᐱᔾᔪᑎᐅᔪᒥᑦ. ᐊᑐᖅᐸᑦᑐᓂ ᑐᓴᕋᑦᓴᒥᑦ “ᑭᓴᕐᓂᐊᕐᓗᒍ” ᑭᐅᔾᔪᑎᒋᔭᐃᑦ, ᐱᖃᓯᐅᔾᔨᔪᓐᓇᕐᓯᒐᔭᖅᑐᑎᑦ ᓇᓗᓇᐃᔭᐃᒍᑎᓂᑦ ᐊᒻᒪ ᐆᑦᑑᑎᑦᓴᓂᑦ ᐃᑲᔫᑎᑦᓴᖏᓐᓂᑦ ᑕᐃᑦᓱᒪ ᑭᓴᖅᑕᐅᓯᒪᔫᑉ. ᑐᕌᖓᑎᒍᓐᓇᓕᕋᔭᖅᑕᐃᑦ ᑭᐅᔾᔪᑎᐅᔪᖅ ᑕᐃᑦᓱᒧᖓ ᐱᔾᔪᑎᐅᔪᒧᑦ – ᐅᕝᕙᓘᓐᓃᑦ ᑐᓴᕋᑦᓴᒧᑦ – ᐅᖃᐅᓯᕆᓇᓱᐊᖅᑕᓐᓂᒃ. ᖃᓄᑐᐃᓐᓇᖅ ᑐᓴᐅᒪᑎᑦᓯᓂᒃᑯᑦ ᖃᓄᐃᓕᐅᕈᑎᓂ, ᑐᕌᒐᕆᔭᐃᑦ ᐅᖃᐅᓯᖃᖅᐸᓐᓂᖅ ᓇᓗᓇᐃᕐᓯᒪᑦᓯᐊᖅᑐᓂᑦ, ᑐᕌᒐᖃᖅᑐᓂᑦ ᐃᓱᒪᓕᐅᕆᔾᔪᑎᓂᑦ ᑐᓴᐅᒪᖁᔭᕐᓄᑦ, ᐅᖃᑲᒻᒪᖏᓪᓗᑎᑦ ᐊᒻᒪ ᓇᓗᓕᖅᑎᑦᑕᐃᓕᒪᕙᓪᓗᒋᑦ ᑐᓴᐅᒪᖁᔭᑎᒃ ᐅᖃᐅᓯᒃᑯᑦ ᐊᓇᕋᓚᑦᑐᑎᑐᑦ.

ᐱᖓᔪᐊᑦ ᐃᑲᔫᑎᐅᔪᖅ ᐊᑐᖅᑐᓂ ᑕᑎᑦᓴᓕᐅᖅᑎᓄᑦ (Trustmakers) ᑐᓴᕋᑦᓴᓂᑦ ᐱᓕᕆᔾᔪᑎᐅᔪᖅ ᐱᔭᕆᐊᑭᓪᓕᑎᕆᒐᕕᑦ ᐱᕙᓪᓕᐊᔪᓕᕆᔨᒧᑦ ᐊᑐᕈᓐᓇᖁᓪᓗᒍ ᑐᑭᓯᒋᐊᕈᑎᖏᓐᓂᑦ ᐃᕝᕕᑦ. ᑐᕌᒐᕆᓗᒋᑦ ᐃᓱᒪᓕᐅᕆᔾᔪᑎᑎᑦ ᑕᐃᒃᑯᓂᖓ ᐃᓱᒪᒋᔭᖃᕐᓗᑎᑦ ᐱᖓᓱᓂᑦ (3) ᐃᓱᒪᒋᒋᐊᓕᓐᓂᑦ ᐱᕙᓪᓕᐊᔪᓕᕆᔨᓄᑦ ᐊᑐᖅᑕᐅᕙᑦᑐᓂᑦ ᐅᓂᒃᑳᓕᐊᖏᓐᓂ, ᑐᑭᓯᒋᐊᕈᑎᒋᔭᑎᑦ ᐱᖃᓯᐅᔾᔭᐅᓯᒪᒐᔭᖅᑐᑦ ᐅᓂᒃᑳᓕᐊᑉ ᐃᓗᐊᓂ ᐊᒻᒪ ᐋᖅᑭᒋᐊᖅᑕᐅᖏᑐᐃᓐᓇᕆᐊᓖᑦ ᐱᕙᓪᓕᐊᔪᓕᕆᔨᒧᑦ ᑭᐱᑎᕆᑎᓪᓗᒍ ᐅᕝᕙᓘᓐᓃᑦ ᐅᖃᐅᓯᓕᕆᑎᓪᓗᒍ ᐅᓂᒃᑳᓕᐊᒥᓂᒃ ᓈᒻᒪᓐᓂᐊᖁᓪᓗᒍ ᐱᓕᕆᔾᔪᑎᖏᓐᓄᑦ.

ᐊᓱᐃᓪᓛᒃ, ᑕᑯᓇᒋᐊᕈᒃ ᐅᖃᐅᓯᕆᓂᐊᖅᑕᐃᑦ – ᐊᒻᒪ ᐱᕙᓪᓕᐊᔪᓕᕆᓂᕐᒧᑦ ᐅᖃᐅᓯᐅᔪᓂᑦ ᐱᓯᒪᒍᕕᒋᑦ – ᐊᒻᒪ ᐱᖓᓱᓂᑦ (3) ᐃᓱᒪᓕᐅᕆᔾᔪᑎᓕᐅᓕᕐᓗᑎᑦ: ᐊᐅᓚᔾᔭᐃᔾᔪᑎᒥᑦ ᑐᓴᕋᑦᓴᒥᑦ, ᓲᕐᓗ ᐅᓇᑎᑐᑦ “ᐃᒪᐃᓕᐅᖅᑐᒍᑦ X.....”, ᐱᔾᔪᑎᒋᔭᕐᓂᒃ ᑐᓴᕋᑦᓴᒥᑦ “ᐃᒪᐃᓕᐅᖅᑐᒍᑦX ᐅᐱᓐᓇᕋᓂ...” ᐊᒻᒪ ᐊᓯᐊᑕ ᐃᑉᐱᒋᔭᖏᓐᓂᑦ ᐃᑉᐱᒍᓱᓐᓂᕐᒥᑦ ᑐᓴᕋᑦᓴᒥᑦ, ᓲᕐᓗ ᐅᓇᑎᑐᑦ “ᑐᑭᓯᐊᔭᕗᑦ ᖃᓄᖅ ᑭᒃᑯᑐᐃᓐᓇᐃᑦ ᐊᑦᑐᖅᑕᐅᓯᒪᒻᒪᖔᑕ ᑕᒪᑦᓱᒧᖓ ᖃᓄᐃᓕᐅᕈᑎᒧᑦ.”