ᑎᑎᕋᖅᓯᒪᔪᑦ

ᓱᓇᒻᒪᑕ ᐱᕙᓪᓕᐊᔪᑦ ᑐᓴᕋᑦᓴᑦ?

ᓱᓇᓄᓪᓕ ᓱᓇᑐᐃᓐᓇᐃᑦ ᑐᓴᐅᒪᔭᐅᒋᐊᖃᖅᐸᑉᐸᑦ? ᑎᓴᒪᐃᓕᖓᔪᓂᑦ (4) ᐃᓗᓕᖃᖅᑐᑦ:


ᑐᓴᕋᑦᓴᐅᓂᐊᕈᑎᒃ, ᓱᓇᑐᐃᓐᓇᐃᑦ ᐃᒪᐃᒋᐊᓖᑦ ᖃᖓᒃᑯᑦ ᓴᖅᑭᕐᓂᖏᑦ, ᐊᑑᑎᖃᕐᓗᑎᒃ, ᓄᑖᖑᓗᑎᒃ ᐊᒻᒪ ᐃᓘᓐᓇᖏᓐᓄᑦ ᓈᒻᒪᒋᔭᐅᒋᐊᑐᒐᓂ.


ᖃᖓᒃᑯᑦ ᓴᖅᑭᕐᓂᖏᑦ ᐱᓪᓗᒋᑦ, ᓱᓇ ᐱᔾᔪᑎᐅᔪᖅ ᐊᑦᑐᐊᓂᖃᖅᑐᖅ ᓱᓇᒧᑦ ᐱᕙᓪᓕᐊᔪᓃᑦᑐᓂᑦ. ᐅᓂᒃᑳᖑᔪᓐᓇᖅᑐᖅ ᒪᓕᑦᑐᒍ ᐊᕐᕌᒎᑉ ᖃᖓᐅᓂᖓ, ᓲᕐᓗ ᐊᖏᕐᕋᖃᖏᑦᑐᓕᕆᓗᓂ ᐅᑭᐅᒃᑯᑦ ᐅᕝᕙᓘᓐᓃᑦ ᑭᑦᑐᕆᐊᓂᑦ ᐋᓐᓂᐊᑖᕈᑎᐅᔪᓐᓇᖅᑐᒥᑦ ᓲᕐᓗ ᐅᐊᓐᓇᖓᓂ ᑰᕐᔪᐊᑉ ᑕᕆᐅᑉ ᐊᑭᐊᓂᕐᒥᐅᑕᓄᑦ ᐋᓐᓂᐊᑖᖑᕙᑦᑐᒥᑦ ᐊᐅᔭᐅᑎᓪᓗᒍ.


ᐊᑑᑎᖃᕐᓂᐊᕈᓂ, ᐅᓂᒃᑳᑦᓴᖅ ᐃᑉᐱᒋᔭᐅᑦᓯᒪᒋᐊᓕᒃ ᑐᓴᐅᒪᑎᑦᓯᔨᒃᑯᑦ ᑐᓴᖅᑎᒐᓱᑦᑕᖏᓐᓄᑦ. ᑐᓴᐅᒪᑎᑦᓯᔨᒃᑯᑦ ᖃᐅᔨᒪᓂᖃᓪᓗᐊᕐᒪᑕ ᐱᔾᔪᑎᒋᓪᓗᒋᑦ ᑐᓴᐅᒪᖁᔭᒥᓂᒃ ᐊᒻᒪ ᓱᓇᓂᑦ ᐃᑉᐱᒍᓱᓐᓂᖃᖅᐸᒻᒪᖔᑕ. ᑕᕝᕙᖓᑦ ᐅᖃᐅᓯᑐᖄᓘᔪᖅ ᐱᕙᓪᓕᐊᔪᓕᕆᔨᓄᑦ, “ᐱᕙᓪᓕᐊᔪᓕᒫᑦᓯᐊᑦ ᓄᓇᓕᓐᓄᖓᔪᑦ” ᐱᓯᒪᔪᖅ. ᓄᓇᕐᔪᐊᕐᒥᑦ ᓇᑭᖕᖔᕐᓯᒪᒐᓗᐊᕈᓂ ᓱᓇᑐᐃᓐᓇᖅ ᐊᑐᖅᑕᐅᔪᖅ, ᐱᕙᓪᓕᐊᔪᓕᕆᔨᐅᑉ “ᐊᖏᕐᕋᐅᑎᓂᐊᖅᑕᖓ”. ᓲᕐᓗ, ᓄᓇᕐᔪᐊᑉ ᐃᓚᖓ ᓴᔪᑉᐱᓚᑦᑐᐊᓘᓚᐅᖅᑎᓪᓗᒍ ᕼᐊᐃᑎᒥ, ᑲᓇᑕᐅᑉ ᐱᕙᓪᓕᐊᔪᓕᕆᔨᖏᑦ ᑐᓴᕋᑦᓴᓂᑦ ᐊᐱᕐᓱᖅᐸᓚᐅᖅᑐᑦ ᕼᐊᐃᑎᒥᐅᑕᓂᑦ ᑲᓇᑕᒦᑦᑐᓂᑦ.


ᐃᒪᐃᑦᑑᓂᐊᕐᓗᓂ “ᓄᑖᖅ” ᐅᓂᒃᑳᖑᔪᖅ ᓄᑖᖑᔪᓐᓇᖅᑐᖅ ᐅᓂᒃᑳᖑᓗᓂ ᐅᕝᕙᓘᓐᓃᑦ ᐃᓚᒋᔭᐅᓗᓂ ᓄᑖᖑᓪᓗᓂ ᐅᓂᒃᑳᓕᐊᖑᓯᒪᔭᕇᖅᑐᒧᑦ. ᓱᓇᑐᐃᓐᓇᐅᔪᓐᓇᖅᑐᖅ ᑕᑯᔭᐅᒐᔪᖕᖏᓪᓗᓂ, ᓴᒃᑯᒐᑦᓴᐅᖏᓪᓗᓂ ᐅᕝᕙᓘᓐᓃᑦ ᑐᓴᐅᒪᒍᒥᓇᕐᓗᓂ ᖃᓄᑐᐃᓐᓇᖅ.


ᑭᖑᓪᓕᖅᐹᖓᑦ, ᐃᓘᓐᓇᖏᓐᓄᑦ ᓈᒻᒪᒋᔭᐅᒋᐊᑐᖏᓐᓂᖓ, ᓱᓇᑐᐃᓐᓇᐅᔪᓐᓇᖅᑐᖅ ᐱᔭᕆᐊᑭᑦᑐᑯᓘᓗᓂ ᓲᕐᓗ ᓴᖅᑮᓗᓂ ᐃᓱᒪᒋᔭᐅᔪᓂᑦ ᐊᑭᕋᖅᑑᑎᓕᓐᓂᑦ ᐱᕙᓪᓕᐊᔪᓂᑦ ᐅᓂᒃᑳᓕᐊᖑᓯᒪᔪᒥᑦ. ᖃᓄᐃᑦᑐᑐᐃᓐᓇᖅ ᐅᓂᒃᑳᓕᐊᑦ, ᐱᕙᓪᓕᐊᔪᓃᒐᓗᐊᖅᐸᑕ, ᓱᓕᖏᑦᑐᓂ ᐅᖃᓕᒫᒐᓕᐊᖑᓯᒪᓗᑎᒃ, ᑕᑯᓐᓇᖅᑕᐅᓗᑎᒃ ᐱᓪᓚᕆᖕᖑᐊᖅᑐᓂ ᐅᕝᕙᓘᓐᓃᑦ ᑕᕐᕆᔭᕐᓂ, ᐊᑲᐅᖏᓕᐅᕈᑎᖃᓲᖑᔪᑦ ᖃᓄᐃᑦᑐᑐᐃᓐᓇᕐᓂᒃ. ᑭᓯᐊᓂᓕ, ᐊᑲᐅᖏᓕᐅᕈᑎᖃᕐᓂᖅ ᐊᒻᒪ ᐊᐳᖃᑎᖃᕐᓂᖅ ᐃᒪᐃᑦᑐᕈᕈᓐᓇᕐᒪᑦ ᕿᓚᒥᑯᓗᒃ ᐱᓗᐊᓕᕐᓂᕐᒥᑦ, ᖃᓄᐃᒍᑎᐅᔪᖅ ᐊᖏᓪᓕᑎᑕᐅᔪᓐᓇᖅᑐᓂ ᐱᓗᐊᕈᑎᐅᓕᕐᓗᓂ ᐊᒻᒪ ᐊᑐᖅᑕᐅᒋᐊᑐᖏᑦᑐᒥᑦ ᐊᑐᕈᑎᐅᓕᕐᓗᓂ. ᐃᓚᖏᑦ ᐱᕙᓪᓕᐊᔪᓂᑦ ᑐᓴᕋᑦᓴᓕᕆᔩᑦ ᓴᖅᑮᑦᑕᐃᓕᒪᓇᓱᑉᐸᑦᑐᑦ ᐱᓗᐊᓕᕐᓂᕐᒥᑦ, ᐊᔾᔨᒌᑉᐸᒐᑎᒃ ᑲᔪᓯᑦᓯᐊᕈᑎᐅᔪᑦ.


ᐃᓗᐊᓃᑦᑐᖅ ᐃᓱᒪᓕᐅᕈᑎᐅᔫᑉ ᐊᑲᐅᖏᓕᐅᕈᑎᐅᑉ ᐱᕙᓪᓕᐊᔪᓕᕆᔨᐅᑉ ᐱᓕᕆᔾᔪᑎᒍᑦ ᑐᑭᓕᐅᕈᑎᒋᕙᑦᑕᖓ ᑐᕌᒐᖃᕐᓂᕐᒥᑦ, ᐃᓗᓪᓕᕐᓱᐃᕙᓪᓗᓂ ᐊᓯᖏᓐᓂᑦ ᐊᑕᐅᓯᐅᑉ ᑕᑯᓐᓇᖅᑕᖏᓐᓂᑦ ᐅᓂᒃᑳᓕᐊᖑᔪᒧᑦ. ᑕᒪᓐᓇ ᐊᑲᐅᖏᓕᐅᕈᑎᖃᕈᓐᓇᕐᒥᔪᖅ ᐊᕙᑎᓕᕆᓂᒃᑯᑦ ᓱᓇᑐᐃᓐᓇᕐᓂᑦ ᐅᕝᕙᓘᓐᓃᑦ ᐊᑐᖅᑕᐅᓯᒪᔪᓂᑦ ᐱᔾᔪᑎᐅᔪᓄᑦ. ᑕᒪᒃᑯᓇᓂ ᐱᔾᔪᑎᐅᔪᓂ, ᐅᓂᒃᑳᓕᐊᒨᕆᓪᓗᓂ ᓯᓚᓕᕆᔨᒥᑦ ᐊᒻᒪ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᑦ ᐅᑉᐱᕈᓱᖏᑦᑐᑦ ᐊᑕᐅᑦᓯᒃᑯᑦ ᓴᖅᑮᔪᓐᓇᖅᑐᑦ ᐊᑐᖅᑕᐅᔪᒥᑦ ᐃᓱᒪᓕᐅᕆᓯᒪᓗᓂ ᐱᑕᖃᓪᓚᕆᓐᓂᖓᓂᑦ ᐋᔩᕈᑎᐅᕙᑦᑐᒥᑦ ᒪᕐᕉᓐᓄᑦ (2) ᐊᔾᔨᒌᖑᔫᓐᓄᑦ ᐅᑉᐱᕆᔭᖃᖅᑑᓐᓄᑦ ᐊᔾᔨᒌᖏᑦᑐᓂᑦ ᐅᑉᐱᕈᓲᑎᓖᓐᓄᑦ. ᓲᕐᓗ, ᓯᓚᓕᕆᔨᐅᔪᖅ ᐱᓯᒪᑦᓯᔪᖅ ᐊᑐᖅᑕᐅᓯᒪᔪᓂᑦ, ᐅᖃᐅᓯᕐᓂᑦ ᐊᒻᒪ ᓱᓇᑐᐃᓐᓇᒃᑯᑦ ᐊᕙᑎᓕᕆᔨᓂᑦ ᐅᖃᐅᓯᐅᓯᒪᔪᓂᑦ ᐃᒪᐃᑦᑎᓪᓗᒍ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᑦ ᐅᑉᐱᕈᓲᑎᖃᖏᑦᑐᖅ ᓴᖅᑮᔪᓐᓇᑎᓪᓗᒍ ᐊᒥᓲᖏᑦᑐᓂᑦ ᐊᒻᒪ ᐱᖃᖏᓯᐊᒻᒪᕆᑦᑐᓂᓗ ᓱᓇᑐᐃᓐᓇᕐᓂᑦ ᐅᑉᐱᕆᔭᖏᓐᓅᖓᔪᓂᑦ ᐊᓯᔾᔨᐸᓪᓕᐊᖏᓐᓂᖓᓂᑦ. ᐱᕙᓪᓕᐊᔪᓕᕆᔨᐅᔪᑦ ᑐᓴᕋᑦᓴᓂᑦ ᑕᒪᑦᓱᒥᖓ ᐊᑐᑦᑕᐃᓕᒪᓇᓱᑉᐸᑦᑐᑦ ᐊᑐᖅᑕᐅᔪᓂᑦ ᓇᖑᓗᕋᐃᓂᕐᒥᑦ ᑐᕌᒐᖃᕋᓱᑉᐸᑦᑐᑎᒃ, ᐊᒻᒪᐃᓛᒃ ᐊᔾᔨᒌᖏᑦᑐᓂᑦ ᑲᔪᓯᑦᓯᐊᕐᓂᖃᖅᐸᑦᑐᓂᑦ.


ᐸᕐᓇᐃᓕᕋᐃᒍᕕᑦ ᖃᓄᐃᓕᐅᕈᑎᐅᔪᓐᓇᖅᑐᓂᑦ ᐊᒻᒪ ᐃᓕᓐᓃᖔᕐᓯᒪᔪᓂᑦ ᑐᓴᐅᒪᑎᑦᓯᓕᕆᔾᔪᑎᓂᑦ, ᐱᒻᒪᕆᐅᔪᖅ ᑐᑭᓯᒪᓇᓱᐊᖅᐸᓐᓂᖅ ᓱᓇᓂᑦ ᐱᕙᓪᓕᐊᔪᓕᕆᔨᐅᔪᑦ ᕿᓂᕐᒪᖔᑕ ᐊᒻᒪ ᓱᓇᓂᑦ ᐃᓱᒪᒋᔭᖃᕐᒪᖔᑕ ᑐᓴᕋᑦᓴᐅᓂᐊᕐᓂᖏᓐᓂᑦ. ᐃᓕᓐᓄᑦ ᐃᑲᔫᑎᖃᕈᓐᓇᖅᑐᑦ ᓂᕆᐅᒋᔭᖃᕈᓐᓇᓂᒃᑯᑦ ᓱᓇᓂᑦ ᐊᒻᒪ ᐅᐸᓗᖓᐃᔭᐃᓂᒃᑯᑦ.

Last modified: Wednesday, 30 October 2024, 2:42 PM