ᑎᑎᕋᖅᓯᒪᔪᑦ

ᑕᑎᒋᔭᖃᕐᓂᖅ

ᑭᒃᑯᑐᐃᓐᓇᐃᑦ ᐃᓗᓪᓕᖅᑐᒐᑐᐃᓐᓇᐅᖏᑦᑐᑦ ᑐᑭᓯᒋᐊᕈᑎᓂᑦ. ᐃᕝᕕᑦ ᐅᖃᐅᓯᕆᔭᖏᓐᓂᑦ ᐃᓱᒪᖏᓐᓅᕆᕙᖏᑦᑐᑦ.


ᐊᑐᓂ ᑭᓇ ᐊᓯᔾᔩᐸᑦᑐᖅ ᑐᑭᓯᒋᐊᕈᑎᓂᑦ ᑕᑯᓐᓇᖅᑕᒥᒍᑦ ᐋᖅᑭᑦᓱᐃᕙᒻᒪᑕ, ᐊᑐᕐᓯᒪᔭᕐᒥᒍᑦ ᐊᒻᒪ ᐃᓱᒪᒋᔭᒥᒍᑦ. ᓈᒻᒪᓐᓂᐊᖁᓪᓗᒍ, ᑭᒃᑯᑐᐃᓐᓇᐃᑦ ᐃᓚᓯᕙᑦᑐᑦ ᐅᕝᕙᓘᓐᓃᑦ ᐃᑉᐱᒍᓱᑉᐸᖏᑦᑐᑦ ᐃᓚᖏᓐᓂᑦ ᐃᕝᕕᑦ ᑐᓴᐅᒪᖁᔭᖏᓐᓂᑦ, ᑐᑭᓕᐅᕈᑎᒥᓂᒃ ᐃᓱᒪᖏᓐᓃᖔᕐᓯᒪᔪᓂᑦ ᐅᖃᐅᓯᖃᖅᐸᑦᑐᑦ ᐃᕝᕕᑦ ᑐᑭᓯᒋᐊᕈᑎᖏᓐᓂᑦ, ᐅᕝᕙᓘᓐᓃᑦ ᐃᓗᓕᖏᓐᓂᑦ ᐋᖅᑭᒋᐊᕆᕙᑦᑐᑦ ᑕᑯᓐᓇᖅᑕᒥᓂᒃ ᐊᑐᖅᑐᑎᒃ. ᑕᒪᓐᓇ ᐱᔾᔪᑎᒋᓪᓗᒍ ᑭᒃᑯᑐᐃᓐᓇᐃᑦ ᑖᑦᓱᒥᖓᑦᓴᐃᓐᓇᖅ ᑐᓴᖅᐸᑦᑐᑦ ᑭᓯᐊᓂ ᐊᔾᔨᒌᖏᑦᑐᓂᑦ ᐃᓱᒪᒋᔭᖃᖅᑐᐃᓐᓇᐅᕙᑦᑐᑦ.


ᐱᔾᔪᑎᒋᓪᓗᒋᑦ ᓴᖅᑭᖅᑐᑦ ᐃᕝᕕᑦ ᑐᓴᐅᒪᑎᑦᓯᔾᔪᑎᖓᓐᓂᑦ, ᑐᑭᓯᔭᐅᖁᔭᑎᑦ ᐅᖃᐅᓯᕆᔪᒪᔭᑎᑦ ᐱᒻᒪᕆᐅᔪᑦ, ᑭᓯᐊᓂ ᐱᒻᒪᕆᒋᖏᑕᖏᑦ ᐃᖅᑲᓇᐃᔮᒃᑯᑦ. ᐱᒻᒪᕆᐅᓂᖅᐹᖑᔪᑦ ᐱᔾᔪᑎᖃᖅᑐᑦ ᐊᒥᓱᓂᑦ ᐃᓅᖃᑎᒌᓐᓂᒃᑯᑦ ᐊᒻᒪ ᐃᓱᒪᓕᕆᓂᒃᑯᑦ ᖃᓄᐃᒍᑎᐅᔪᑦ ᐃᓱᒪᒋᔭᐅᔪᑦ ᐃᓱᒪᒋᔭᖏᓐᓂ ᐊᑐᓂ ᑐᓴᖅᑎᑕᐅᔪᑦ.


ᑕᒪᒃᑯᓇᖕᖓᓕᒫᑦᓯᐊᖅ ᐱᔾᔪᑎᐅᔪᓂᑦ, ᐊᑕᐅᓯᖅ ᑖᓂᖅᑐᓛᖅ ᐊᓯᖏᓐᓂᑦ ᐊᑦᑐᐊᔪᓂᑦ ᑐᓴᐅᒪᔭᐅᖁᔭᐃᑦ ᓈᒻᒪᒋᔭᐅᓂᐊᕐᒪᖔᖅ, ᐊᒻᒪ ᐃᑲᔪᕐᓱᐃᔾᔪᑎᒋᓗᒍ, ᐃᓕᓐᓂᒃ ᐊᒻᒪ ᑐᓴᕋᑦᓴᓐᓂᒃ. ᑕᐃᓐᓇ ᐱᔾᔪᑎᐅᔪᖅ ᑕᑎᒋᔭᖃᕐᓂᖅ.


ᑐᓴᐅᒪᑎᒐᓱᐊᖅᑕᑎᑦ ᐃᓕᓐᓂᒃ ᑕᑎᒋᔭᖃᓗᐊᖏᒃᑯᑎᒃ ᐊᒻᒪ ᑲᑐᔾᔨᖃᑎᒌᖑᔪᓂᑦ ᑭᒡᒐᑐᖅᑕᓐᓂᒃ ᐃᕝᕕᑦ, ᑕᐃᒪ ᐊᑲᐅᓂᖅᐹᖑᒐᔭᖅᑐᖅ ᓴᖅᑭᖁᒐᔭᖅᑕᐃᑦ ᑐᑭᓯᒋᐊᕈᑎᒋᔭᑎᑦ ᐊᑦᑐᐃᓂᖃᕋᔭᖏᓯᐊᖅᑐᑦ ᑐᓴᐅᒪᖁᔭᓐᓂᒃ. ᐱᐅᖏᓂᖅᐹᒃᑯᑦ, ᑕᑎᒋᔭᐅᓗᐊᕋᓂ ᑐᑭᖃᖅᑐᖅ ᑐᓴᐅᒪᖁᔭᑎᑦ ᐃᓱᒪᒋᔭᖃᕈᓐᓇᕐᒪᑕ ᐃᕝᕕᑦ ᐅᖃᐅᓯᕆᖏᑕᖏᓐᓂᑦ.


ᓯᕗᓪᓕᖅᐹᒥ ᑲᑎᑦᓯᒐᐃᒐᑦᑕ, ᑲᑎᑕᕗᑦ ᐃᓱᒪᒋᓕᖅᐸᑦᑕᕗᑦ ᖃᓄᐃᑦᑑᒻᒪᖔᖅ. ᐱᖃᑎᒋᕙᕗᑦ ᐅᕝᕙᓘᓐᓃᑦ ᐊᑭᕋᕆᕙᕗᑦ? ᐅᕙᓐᓂᒃ ᑕᐱᖃᖅᐸᑦ ᐅᕝᕙᓘᓐᓃᑦ ᐊᓯᓐᓂᒃ? ᐊᐱᖅᑯᑎᖃᓕᖅᐸᑦᑐᑎᒃ ᐃᒫᒃ, ᑖᒃᑯᐊ “ᐅᕙᖓᐅᕙᑦ” ᐅᕝᕙᓘᓐᓃᑦ “ᐅᕙᖓᐅᖏᓚᑦ”? ᑕᒪᓐᓇ ᐱᓯᒪᔪᖅ ᐅᕙᑦᓯᐊᕈ ᐊᑐᖅᐸᓚᐅᖅᑕᑎᓐᓂᑦ ᐊᒻᒪ ᐊᓯᔾᔨᐸᓪᓕᐊᓂᑦᑎᓐᓂᑦ ᐆᒪᔫᓗᑕ.


ᖃᐅᔨᓴᖅᑎᓪᓗᒋᑦ ᓇᓗᓇᐃᔭᐃᓯᒪᔪᑦ ᑐᓴᐅᒪᑎᑦᓯᔨᐅᔪᖅ ᐃᓱᒪᒋᔭᐅᒍᓂ ᑕᑎᒋᔭᑦᓴᐅᖏᓐᓂᖓᓂᑦ, ᐊᑐᖅᑕᐅᔪᓈᓘᔪᖅ ᑐᓴᐅᒪᑎᑕᐅᔪᑦ ᐃᓱᒪᒋᔭᖃᕋᔭᕐᓂᖏᑦ ᑕᐃᒫᖑᖏᑦᑐᖅ ᐅᖃᐅᓯᖃᕐᓂᖓᓄᑦ ᑐᓴᐅᒪᑎᑦᓯᓇᓱᐊᖅᑑᒐᓗᐊᖅ.


ᑕᒪᓐᓇ ᑕᑯᑦᓴᐅᔪᖅ ᐱᓪᓗᒋᑦ ᐊᑭᕋᖅᑐᖅᑎᐅᔪᓂ ᑲᐴᖅᑕᐅᔪᒪᕙᖏᑦᑐᓂᑦ ᐋᓐᓂᐊᔭᐃᒃᑯᑎᓂᑦ. ᑕᒪᒃᑯᓄᖓ ᐊᑐᖅᑕᐅᒐᔪᑦᑐᖅ ᑕᑎᒋᔭᖃᖏᒻᒪᑕ ᓱᓇᑐᐃᓐᓇᕐᓂᑦ ᐊᕙᑎᓕᕆᔾᔪᑎᓂᑦ ᐊᒻᒪ ᑕᑎᒋᔭᖃᖏᒻᒪᑕ ᒐᕙᒪᒃᑯᓐᓂᑦ. ᐊᓱᐃᓪᓛᒃ, ᐊᔪᐃᓐᓈᕆᔭᐅᓗᑎᒃ ᐅᖃᐅᔾᔭᐅᒐᐃᒻᒪᑕ ᑕᒻᒪᕐᓯᒪᓂᖏᓐᓂᑦ ᐊᒻᒪ ᓴᖅᑮᕕᐅᕙᑦᑐᑎᒃ ᖃᓄᖅ ᑕᒻᒪᕐᓯᒪᓂᖏᓐᓂᑦ ᐊᑐᖅᑕᐅᓯᒪᔪᓂᑦ, ᖃᐅᔨᓵᖑᓯᒪᔪᓂᑦ ᐊᒻᒪ ᐱᒻᒪᕆᐊᓗᓐᓂᑦ ᑕᑯᑦᓴᓪᓚᕆᓐᓂᑦ, ᑕᐃᓐᓇ ᑲᐴᖅᑕᐅᔪᒪᖏᑦᑐᖅ ᐊᑭᕋᖅᑐᖅᑎ ᐃᒪᐃᑉᐸᑦᑐᖅ “ᐊᑭᕋᖅᑐᓕᖅᐸᓪᓕᐊᑐᐃᓐᓇᖅᑐᖅ”. ᑐᓴᐅᒪᑎᑦᓯᔨᒥᑦ ᑕᑎᒋᔭᖃᖏᓐᓇᒥᒃ, ᐅᑉᐱᕈᓲᑎᖃᖅᐸᑦᑐᑦ ᐊᑭᕋᖅᑐᖅᑐᒥᑦ.


ᑭᓯᓂᓕ, ᑐᓴᐅᒪᑎᑦᓯᔨᒥᑦ ᑕᑎᒋᔭᖃᕈᑎᒃ ᐅᕝᕙᓘᓐᓃᑦ ᒪᑐᐃᖓᒍᑎᒃ ᖃᓄᐃᓕᐅᕆᐊᖃᕐᓂᕐᒥᓂᒃ, ᑭᖑᓪᓕᖅ ᐊᐱᖅᑯᑎᐅᓕᕋᔭᖅᑐᖅ ᐅᓇ, “ᐱᔪᓐᓇᓯᐊᖅᐸᑦ?” ᑐᓴᐅᒪᑎᑦᓯᔪᖅ ᖃᐅᔨᒪᓂᖃᖅᐸ ᐅᕝᕙᓘᓐᓃᑦ ᖃᐅᔨᒪᕙᑦ ᖃᓄᐃᓕᐅᕐᓂᕐᒥᓂᒃ?


ᑭᐅᔾᔪᑎᖓᑦ ᑖᑦᓱᒧᖓ ᐊᐱᖅᑯᑎᒧᑦ ᐋᒡᒐᐅᑉᐸᑦ, ᑐᓴᐅᒪᑎᑕᐅᓇᓱᐊᖅᑐᖅ ᐃᓱᒪᒋᔭᖃᕋᔭᖅᑐᖅ ᐃᓕᓐᓂᒃ ᐱᑦᓯᐊᕋᓱᓐᓂᕐᓂᒃ ᑭᓯᐊᓂ ᐅᑉᐱᕆᔭᑦᓴᐅᓗᐊᕋᑎᒃ.


ᑕᒪᓐᓇ ᑕᑯᓐᓇᖅᑕᐅᒐᔪᑦᑐᖅ ᐃᓱᒪᒋᔭᖃᑦᓯᐊᖅᑐᑦ ᐱᑦᓯᐊᕈᒪᔪᑦ ᓯᓚᑖᓂᒥᐅᑕᐃᑦ ᓄᓇᓕᐅᑉ ᐅᐸᑦᑕᖏᑕ ᐃᓄᑭᑦᑐᓄᑦ, ᓇᒧᑐᐃᓐᓇᖅ ᐊᖅᑯᑎᖃᓗᐊᖏᑦᑐᒧᑦ ᓄᓇᓕᓐᓄᑦ ᑐᓴᐅᒪᑎᑦᓯᒋᐊᖅᑐᖅᓯᒪᑎᓪᓗᒋᑦ ᐱᒻᒪᕆᐅᔪᒥᑦ ᓱᓇᑐᐃᓐᓇᕐᒥᑦ. ᑕᑯᓐᓇᖅᑕᐅᔪᓐᓇᖅᑐᑦ ᐱᑦᓯᐊᕋᓱᓐᓂᖏᓐᓂᑦ, ᑭᓯᐊᓂ ᓄᓇᓕᐅᑉ ᓯᓚᑖᓃᖔᕐᓯᒪᓪᓗᑎᒃ, ᑕᑯᓐᓇᖅᑕᐅᕙᖏᑦᑐᑦ ᐱᑦᓯᐊᕈᓐᓇᕐᓂᖏᓐᓂᑦ ᐅᐱᓐᓇᕋᓂ ᐃᓱᒪᒋᔭᐅᕙᑦᑐᑦ ᑕᐃᒃᑯᐊ ᖃᐅᔨᒪᖏᑦᓯᐊᕐᒪᑕ ᖃᓄᖅ ᐃᓅᓯᖃᕋᓱᓐᓂᕐᒥᑦ ᓄᓇᓕᓐᓂ ᓇᒧᑐᐃᓐᓇᖅ ᐊᖅᑯᑎᖃᓗᐊᖏᑦᑐᓂ ᐃᓄᑭᑦᑐᓂ ᑐᖔᓃᑦᑐᓂᑦ 100. ᐊᓱᐃᓪᓛᒃ, ᓈᓚᑦᓯᐊᑐᐃᓐᓇᐸᑦᑐᑦ ᑭᓯᐊᓂ ᑐᓴᐅᒪᖁᔭᐅᔪᖅ ᐊᑦᑐᐃᔾᔪᑎᖃᖅᐸᖏᑦᑐᖅ. ᖃᓄᐃᓕᔪᖃᖏᑦᑐᖅ.


ᑐᓴᐅᒪᑎᑦᓯᔨᐅᓗᑎᑦ ᐅᕝᕙᓘᓐᓃᑦ ᑲᑐᔾᔨᖃᑎᒌᖑᓗᓯ, ᐊᓂᒍᐃᕗᑎᑦ ᒪᕐᕉᓐᓂᒃ (2) ᖃᐅᔨᓴᐅᑏᓐᓂᒃ: ᑐᓴᐅᒪᖁᔭᓯ ᑕᑎᒋᔭᖃᐸᓗᑦᑐᑦ ᐃᓕᓐᓂᒃ ᐊᒻᒪ ᐃᓱᒪᒋᔭᖃᖅᑐᑎᒃ ᓴᖅᑮᔪᓐᓇᕈᕕᑦ ᐅᖃᐅᓯᕆᔭᓐᓂᒃ, ᑐᓴᐅᒪᑎᓇᓱᐊᖅᑕᑎᑦ ᐃᓕᓐᓂᒃ ᓱᓕᔪᕐᓴᕐᓂᕐᓴᐅᔪᓐᓇᓕᕋᔭᖅᑐᑦ ᐅᖃᐅᓯᕆᔭᓐᓂᒃ, ᑕᑯᓐᓇᖅᑕᒥᓂᒃ ᐱᐅᓯᕐᒥᓂᓪᓘᓐᓃᑦ ᐊᓯᔾᔩᓗᑎᒃ, ᐅᕝᕙᓘᓐᓃᑦ ᖃᓄᑭᐊᖅ ᐃᓕᓐᓂᒃ ᐃᑲᔪᕐᓱᐃᔪᓐᓇᓕᖅᑐᑎᒃ.


ᐱᓕᕆᔾᔪᑎᒥᓂᑎᑦ, ᐊᑐᖅᑕᐅᓯᒪᔪᑦ ᐊᒻᒪ ᑐᑭᓯᒋᐊᕈᑎᐅᔪᑦ, ᓇᓗᓇᐃᔭᐅᑎᑎᑦ ᖃᐅᔨᒪᓂᕐᓂᒃ, ᐃᓘᓐᓇᑎᒃ ᐊᑐᓕᕈᓐᓇᖅᑐᑦ – ᑭᓯᐊᓂ ᐃᓱᒪᒋᔭᐅᓕᕈᓐᓇᕈᕕᑦ ᑕᑎᒋᔭᐅᔪᓐᓇᓂᕐᓂᒃ ᐊᒻᒪ ᐱᔪᓐᓇᓂᕐᓂᒃ ᐅᖃᐅᓯᕆᔭᓐᓂᒃ.


ᐊᒥᓱᑲᓪᓚᐃᑦ ᑭᒃᑯᑐᐃᓐᓇᐃᑦ ᐅᕝᕙᓘᓐᓃᑦ ᑲᑐᔾᔨᖃᑎᒌᖑᔪᑦ ᐊᓪᓗᐃᓲᖑᔪᖅ ᖃᐅᔨᓴᐅᑎᓂᑦ ᐊᒻᒪ ᐊᓂᐊᑦᓯᑦᓴᐅᑎᒋᓕᖅᑐᑎᒃ ᑐᑭᓯᒋᐊᕈᑎᓂᑦ. ᑕᐃᒪᐃᑎᓪᓗᒋᑦ, ᐃᓵᑦᓯᓯᒪᕙᑦᑐᑦ ᑕᐃᔭᐅᔪᒥᑦ “ᑐᑭᓯᒋᐊᕈᑎᓂᑦ ᐱᑕᖃᖏᓐᓂᖅ” ᑐᓴᐅᒪᐅᑎᓕᕆᓂᒃᑯᑦ.


ᑕᐃᓐᓇ ᐱᓕᕆᔾᔪᑎᐅᔪᖅ ᒪᓕᑦᑕᐅᓯᒪᔪᖅ ᐃᓱᒪᓕᐅᕆᔾᔪᑎᐅᓯᒪᔪᒥᑦ ᑭᒃᑯᑐᐃᓐᓇᐃᑦ ᐃᓗᓪᓕᖅᑐᒐᐅᒻᒪᑕ ᑐᑭᓯᒋᐊᕈᑎᓂᑦ. ᐃᒪᐃᓕᖓᕙᑦᑐᑦ:


  • ᑐᑭᓯᒋᐊᕈᑎᖃᖅᑐᖓ
  • ᐱᑕᖃᖏᓐᓇᕕᑦ ᑐᑭᓯᒋᐊᕈᑎᓂᑦ ᐱᑕᖃᖏᑦᑐᑎᑦ
  • ᑭᓯᐊᓂ ᐃᓱᒫᓗᑦᑕᐃᓕᒋᑦ, ᐃᓕᓐᓅᓂᐊᖅᐸᒃᑲ ᑐᑭᓯᒋᐊᕈᑏᑦ
  • ᖃᐅᔨᒪᓂᐊᓕᖅᑐᑎᑦ ᐅᕙᖓ ᖃᐅᔨᒪᔭᖏᓐᓂᑦ ᐊᒻᒪ ᐃᓱᒪᓕᕐᓗᑎᑦ ᐅᕙᖓᑎᑐᑦ

ᑖᓐᓇ ᐅᑦᑑᑎᐅᔪᖅ ᐱᓕᕆᔾᔪᑎᐅᔪᓐᓇᖏᑦᑐᖅ. ᐃᑉᐱᒍᓱᖏᑦᑐᖅ ᐊᐅᓚᓂᖏᓐᓂᑦ ᐊᒻᒪ ᐊᑑᑎᒋᔭᖏᓐᓂᑦ ᐊᑐᓂ ᑐᓴᐅᒪᑎᑕᐅᓇᓱᐊᖅᑐᑦ. ᑐᕌᒐᖃᖅᑐᖅ ᑐᓴᐅᒪᑎᑦᓯᓇᓱᐊᖅᑑᑉ ᐱᓯᒪᖏᑕᖏᓐᓂᑦ ᐊᔾᔨᖏᓐᓂᑦ ᑐᓴᐅᒪᑎᑕᐅᓇᓱᐊᖅᑐᑦ, ᑐᑭᓯᒋᐊᕈᑎᓂᑦ.


ᐱᕙᓪᓕᐅᑎᒍᓐᓇᓯᐊᖅᑐᖅ ᐃᓱᒪᒋᔭᖃᕐᓂᐅᔪᖅ ᓱᓇᓂᑦ ᑐᓴᐅᒪᑎᑦᓯᓇᓱᐊᖅᑐᖅ ᐅᖃᐅᓯᖃᕐᒪᖔᖅ ᑐᓴᖅᑎᒐᓱᑦᑕᒥᓂᒃ; ᐅᖃᐅᓯᑦᑕᖓ, ᑕᑯᑦᓴᐅᑎᑕᖏᑦ, ᐅᓂᒃᑳᖏᑦ ᐊᒻᒪ ᐊᑐᖅᑕᐅᓯᒪᔭᓂ ᐃᓱᒪᒋᔭᐅᔭᕇᖅᑐᑦ ᑭᒃᑯᑐᐃᓐᓇᕐᓄᑦ. ᐱᕈᖅᐸᓪᓕᐊᒍᓐᓇᖅᑐᖅ ᐃᓘᓐᓇᖏᓐᓄᑦ ᐃᓱᒪᒋᔭᐅᔪᓂᑦ ᑐᓴᐅᒪᑎᑕᐅᓇᓱᐊᖅᑐᑦ ᐱᕈᐃᖃᑎᖃᖅᐸᓪᓕᐊᓂᐊᕐᒪᑕ ᐃᓱᒪᓕᐅᕆᔾᔪᑎᐅᓯᒪᔪᓂᑦ ᐃᓚᒋᓗᒍ ᑐᓴᐅᒪᑎᑦᓯᓇᓱᐊᖅᑐᖅ.


ᐅᖃᐅᓯᐅᑎᓪᓗᒋᑦ ᐃᓱᒪᓕᐅᕆᔾᔪᑎᑦᓴᑦ ᐱᓕᕆᔾᔪᑎ ᐃᓕᑕᕐᓯᔾᔪᑎᐅᓯᒪᔪᖅ ᐱᕈᐃᔪᓐᓇᓂᕐᓂᒃ ᑕᑎᒋᔭᖃᕐᓂᕐᒥᑦ ᐊᒻᒪ ᓱᓕᔪᕆᔭᐅᔪᓐᓇᓂᕐᒥᑦ ᐊᑦᑐᐊᖃᑎᒋᓪᓗᒋᑦ ᑐᓴᐅᒪᑎᑕᐅᓇᓱᐊᖅᑐᑦ ᑐᑭᖃᑦᓯᐊᑐᒃᑯᑦ, ᑐᓴᖅᑎᑦᓯᑐᐃᓐᓇᖏᓪᓗᓂ ᑐᑭᓯᒋᐊᕈᑎᓂᑦ. ᐃᑲᔪᖅᐸᒃᑲᕕᒋᑦ ᐃᓕᓐᓂᒃ ᑐᑭᓯᑎᓇᓱᐊᖅᑐᒋᑦ, ᐊᒻᒪ ᑕᐃᒃᑯᓂᖓ ᑐᑭᓯᒋᐊᕈᑎᓂᑦ ᓱᓕᑎᑦᓯᓪᓗᓂ ᐊᒻᒪ ᐊᑑᑎᖃᖅᑎᑦᑐᒋᑦ. ᐃᑲᔪᖅᐸᑦᑕᑎᑦ ᓈᒻᒪᑦᓯᑎᓇᓱᐊᖅᑐᒍ ᐃᓗᐊᓂ ᐊᑐᖅᐸᑦᑕᖏᑕ ᓄᓇᕐᔪᐊᕐᒥᒃ ᖃᓄᖅ ᑕᑯᓐᓇᖅᑕᖏᒍᑦ ᐊᒻᒪ ᐊᑐᖅᐸᑦᑕᖏᒍᑦ.


ᑭᓯᐊᓂ ᐊᑐᖅᑎᓪᓗᑎᑦ ᐅᐃᒪᔮᕐᓂᕐᒥᑦ ᐱᕙᓪᓕᐊᔪᓂᑦ ᑐᓴᕋᑦᓴᓂᑦ, ᑕᑯᓐᓇᖅᑕᐅᓕᖅᑎᓪᓗᑎᑦ ᐃᓕᓐᓄᐃᓐᓇᖅ ᐱᓇᓱᐊᖅᑎᓪᓗᑎᑦ ᐊᒻᒪ ᐅᖃᑦᓯᐊᖅᐸᓐᓇᑎᑦ, ᑕᑎᒋᔭᐅᔪᓐᓇᐅᑏᑦ ᓱᕋᑉᐸᑦᑐᖅ. ᒪᑦᓱᒥᖓ ᐊᑐᕋᓱᑦᑎᓪᓗᑎᑦ “ᐊᔪᐃᓐᓇᕐᓗᑎᑦ ᖃᓄᐃᓕᔭᐅᔪᓐᓇᓂᕐᓂᒃ ᐲᕐᓯᓇᓱᐊᖅᑎᓪᓗᑎᑦ” ᐃᓱᒪᒋᔭᖃᓗᐊᕐᓇᑎᑦ ᐅᕝᕙᓘᓐᓃᑦ ᐃᓱᒫᓘᑎᖃᖏᓯᐊᖅᑐᑎᑦ ᑕᐃᒃᑯᓂᖓ ᐊᓯᓐᓂᒃ ᐊᑦᑐᖅᑕᐅᓯᒪᔪᓂᑦ ᖃᓄᐃᓕᐅᕈᑎᒋᓯᒪᔭᕐᓂᒃ, ᑕᐃᒫᑦᓯᐊᖅ ᑕᑯᓐᓇᖅᑕᐅᔪᑎᑦ ᐃᓕᓐᓄᐃᓇᑦᓯᐊᖅ ᐱᓇᓱᐊᕐᓂᕐᓂᒃ ᐊᒻᒪ ᑕᑎᒋᔭᐅᔪᓐᓇᕐᓂᕆᔭᐃᑦ ᓱᕋᑦᑐᖅ.


ᐃᑉᐱᒍᓱᖏᒃᑯᕕᑦ ᐊᐱᖅᑯᑎᒥᑦ ᑐᓴᖅᑐᔮᖏᓪᓗᒍ ᐊᒻᒪ ᐅᖃᐅᓯᖃᓯᑦᓴᐅᑎᒋᓗᑎᑦ ᐅᖃᐅᓯᕆᔪᒪᔭᕐᓂᒃ, ᑐᓴᐅᒪᑎᓇᓱᐊᖅᑕᑎᑦ ᐃᓕᓐᓂᒃ ᑕᑯᓐᓇᖅᑐᑦ ᑕᐃᒪᐃᓕᐅᖅᑎᓪᓗᑎᑦ ᐊᒻᒪ ᐅᖃᐅᓯᕆᔭᑎᑦ ᐅᑉᐱᕆᔭᐅᔪᓐᓃᕈᓐᓇᕐᒪᑕ.


ᓯᕗᓕᖅᑎᐅᔪᑦ ᐅᖃᐅᔾᔪᐃᒐᐃᒻᒪᑕ ᑐᓴᐅᒪᑎᑦᓯᓕᕆᔨᕐᒥᓂᒃ ᐊᑑᑎᒋᓪᓗᐊᑕᕆᒻᒪᒋᑦ ᓴᐳᔾᔨᓯᒪᓂᖅ ᑲᑐᔾᔨᖃᑎᒌᒥᑦ ᐊᒻᒪ ᓯᕗᓕᖅᑎᖏᓐᓂᑦ ᖃᓄᑐᐃᓐᓇᑦᓯᐊᖅ, ᐱᓕᕆᔾᔪᑎᒋᔭᒥᓂᒃ ᐊᒻᒪ ᑕᐃᒃᑯᓂᖓ ᑲᑐᔾᔨᖃᑎᒌᖏᑕ ᑕᑯᑦᓴᐅᓯᐊᖅᑐᑦ.


ᑕᒪᒃᑯᐊ ᓇᓪᓕᑐᐃᓐᓇᖏᑦ ᐱᓕᕆᔾᔪᑎᒋᔭᖏᑦ ᑖᓂᖅᑐᓯᐊᖅᑐᑦ ᑕᑯᑦᓴᐅᓯᐊᖅᑐᑦ. ᓴᓇᐅᒐᐅᔪᑦ ᕿᑎᐊᓂᑦ ᐊᕐᕌᒍᐃᑦ 1900-ᓂᑦ ᓈᓴᐅᑎᓕᓐᓂᑦ. ᐅᓪᓗᒥᐅᓕᖅᑐᕐᓕ, ᑭᒃᑯᑐᐃᓐᓇᐃᑦ ᐅᔾᔨᕈᓲᑎᖃᕐᓂᕐᓴᐅᕙᓕᖅᑐᑦ, ᐊᒻᒪ ᐃᑉᐱᒍᓱᓐᓂᓴᐅᓗᑎᒃ, ᑕᒪᒃᑯᓂᖓ ᐱᐅᓗᐊᖏᑦᑐᓂᑦ ᐱᓕᕆᔾᔪᓯᐅᔪᓂᑦ. ᑭᐅᔾᔪᑎᖏᑦ ᐱᐅᖏᑦᑑᒐᔪᑦᑐᑦ, ᕿᓚᒥᐅᕙᑦᑐᑎᒃ ᐊᒻᒪ ᓇᓪᓕᒋᔭᖃᖏᓯᐊᖅᑐᑎᒃ.


ᑕᑎᒋᔭᐅᔪᒪᓂᐊᕐᓗᓂ ᒪᑐᐃᖓᑦᓯᐊᕆᐊᖃᖅᐸᑦᑐᑎᑦ ᐊᒻᒪ ᓱᓕᔪᓂᑦ ᐅᖃᖅᐸᓪᓗᑎᑦ ᐊᔪᕐᓇᖏᓐᓂᖏᒍᑦ ᐃᓗᖏᓐᓂ ᑭᓪᓕᖃᐅᑎᒋᔭᕕᑦ ᐊᒻᒪ ᐱᑐᐃᓐᓇᐅᖏᔾᔪᑎᒋᔭᕕᑦ. ᐊᒥᓱᐊᓘᒻᒪᑕ ᓱᓇᑐᐃᓐᓇᐃᑦ ᒪᓕᒐᑎᒍᑦ ᐅᖃᐅᓯᕆᔪᓐᓇᖏᑕᑎᑦ. ᑭᓯᐊᓂ ᒪᑐᐃᖓᓂᖅ ᐊᒻᒪ ᓱᓕᓂᖅ, ᐱᓗᐊᖅᑐᒥ ᐊᑲᐅᖏᓗᐊᖅᑎᓪᓗᒍ ᐃᓕᓐᓄᑦ, ᐊᑐᕈᒪᓂᐊᖅᑕᑎᑦ.


ᐊᖅᑯᑎᑑᒻᒪᑕ ᑕᑎᒋᔭᐅᓂᕐᒧᑦ, ᓱᓕᔪᓐᓇᓂᕐᒧᑦ ᐊᒻᒪ ᐃᑲᔪᕐᓱᐃᓂᕐᒧᑦ.

Last modified: Wednesday, 30 October 2024, 1:00 PM