ᑎᑎᕋᖅᓯᒪᔪᑦ

ᑐᑭᓯᓇᖅᑐᑦ ᐅᖃᐅᓰᑦ


ᐱᕙᓪᓕᐊᔪᓕᕆᑎᓪᓗᒋᑦ ᑐᓴᕋᑦᓴᓂᑦ, ᑐᓴᐅᒪᑎᑦᓯᓕᕆᔨᐅᔪᑦ ᐅᓂᒃᑳᓕᐅᖅᐸᓂᐊᖅᑐᑦ ᐊᑐᖅᑐᑎᒃ ᐃᓕᓐᓂᐊᕐᕕᐊᓗᓐᓅᐸᑦᑐᓄᑦ ᐅᖃᐅᓯᐅᔪᓂᑦ ᑐᖔᓂᓘᓐᓃᑦ. ᐊᑐᖅᐸᑦᑐᑦ ᐅᖃᐅᓯᕐᓂᑦ ᓇᓗᓇᖏᑦᑐᓂᑦ. ᑕᐃᒪᐃᑉᐸᖏᒃᑯᕕᑦ, ᖃᐅᔨᒪᓂᖃᖏᑦᑐᑦ ᐊᒻᒪ ᑐᐊᕕᐊᖃᕆᐊᓕᐅᔪᑦ ᐱᕙᓪᓕᐊᔪᓕᕆᔨᐅᔪᑦ ᓴᖑᑎᑦᓯᔪᓐᓇᖅᑐᑦ ᐃᕝᕕᑦ ᐅᖃᐅᓯᖏᓐᓂᑦ ᐊᒻᒪ ᑎᑎᕋᕐᓗᓂᒋᑦ ᓇᓗᓇᖏᑦᑐᓄᑦ ᐅᖃᐅᓯᕐᓄᑦ. ᑕᒻᒪᕈᒪᖏᒃᑯᕕᑦ, ᐊᑲᐅᓂᕐᓴᐅᒐᔭᖅᑐᖅ ᐅᖃᓕᒪᕙᒃᑯᕕᑦ ᐅᖃᐅᓯᖃᖅᐸᓪᓗᑎᑦ ᓇᓗᓇᖏᑦᑐᓂᑦ ᐅᖃᐅᓯᕐᓂᑦ ᑐᓴᐅᒪᖃᑎᖃᖅᑎᓪᓗᑎᑦ ᐱᕙᓪᓕᐊᔪᓕᕆᔨᒥᑦ.


ᐊᓱᐃᓪᓛᒃ, ᓱᓇᐅᒻᒪᑦ ᓇᓗᓇᖏᑦᑐᖅ ᐅᖃᐅᓯᖅ? ᐃᒪᐃᑦᑐᑐᐃᓐᓇᐅᖏᑦᑐᖅ ᑭᖑᕝᕖᓂᖅ ᐅᖃᐅᓯᕐᓂᑦ ᓇᓗᓇᖅᑐᓂᑦ ᓇᓗᓇᖏᑦᑐᓄᑦ ᐅᖃᐅᓯᕐᓄᑦ.


[ᑕᑯᑦᓴᑦ: ᐃᒪᐃᑦᑑᖏᑦᑐᖅ “ᑐᑭᖃᑦᓯᐊᕈᓐᓃᑎᑦᓯᓂᖅ”]


ᐱᒋᐊᖅᐸᑦᑐᑦ ᖃᐅᔨᒪᓂᕋᕐᓂᒃᑯᑦ ᐊᑐᖅᑐᓂ ᓇᓗᓇᖏᑦᑐᓂᑦ ᐅᖃᐅᓯᕐᓂᒃ ᐃᒪᐃᓕᖓᓂᕋᐃᖏᑦᑐᑦ ᐃᓕᓐᓂᒃ “ᑐᑭᖃᑦᓯᐊᕈᓐᓃᑎᑦᓯᓂᖅ” ᐃᓱᒪᓕᐅᕆᔾᔪᑎᓐᓂᑦ. ᓇᓗᓇᖅᑐᕐᔪᐊᒻᒪᕆᐊᓗᐃᑦ ᐃᓱᒪᓕᐅᕆᔾᔪᑎᐅᔪᑦ ᐅᖃᐅᓯᐅᔪᓐᓇᕐᒥᔪᑦ ᓇᓗᓇᖏᑦᑐᓂᑦ ᐅᖃᐅᓯᕐᓂᒃ ᐅᖃᐅᓯᖃᕐᓗᑎᒃ.


ᓲᕐᓗ, ᐃᓚᒌᓄᑦ ᓗᑦᑖᖑᔪᑦ ᐅᖃᐅᓯᖃᖅᐸᑦᑐᑦ ᐊᔾᔨᒋᖏᑕᖏᓐᓂᑦ ᐅᖃᐅᓯᕐᓂᑦ ᐅᖃᖃᑎᖃᖅᑐᓂ ᓗᑦᑖᖅᑕᒥᓂᒃ ᐊᒻᒪ ᐅᖃᖃᑎᖃᖅᑐᓂ ᐊᓯᐊᓂᑦ ᓗᑦᑖᖑᖃᑎᒥᓄᑦ. ᑕᒪᐅᓇ ᑐᑭᖃᖏᑦᑐᖅ ᓗᑦᑖᖅ ᓯᓚᐃᑦᑐᕈᓘᓱᕆᑦᓯᒪᓂᖓᓂᑦ ᓘᑦᑖᖅᑕᒥᓂᒃ, ᑐᑭᖃᖅᑐᖅ ᓗᑦᑖᖅ ᑐᑭᓯᐊᔪᖅ ᓗᑦᑖᖅᑕᖓ ᐋᓐᓂᐊᔪᓕᕆᔾᔪᑎᓂᑦ ᐱᓕᒻᒪᓴᕐᓯᒪᖏᒻᒪᑦ. ᓗᑦᑖᖅ ᐊᑐᖅᐸᑦᑐᖅ ᐅᖃᐅᓯᕐᓂᒃ ᐊᒻᒪ ᓇᓗᓇᐃᔭᐃᑎᓂᑦ ᑕᒪᒃᑮᓐᓄᑦ ᑐᑭᓯᒋᐊᔭᐅᔪᓂᑦ.


ᕆᑦᓱᕐᑦ ᕙᐃᒪᓐ, ᐊᕐᕌᒍᐃ ᐱᒋᐊᕈᑎᖃᖅᑎᓪᓗᒋᑦ 1900-ᓂᑦ ᓅᐱᐅᓪᒥᑦ ᐱᔾᔪᓯᐊᓚᐅᕐᓯᒪᓂᒃᑯᑦ ᖃᐅᔨᓴᖅᑎᐅᓂᒃᑯᑦ ᓱᓇᑐᐃᓐᓇᐃᑦ ᖃᓄᐃᔾᔪᓯᕆᕙᑦᑕᖏᓐᓂᑦ ᓱᓇᑐᐃᓐᓇᕐᓂᒃ ᐱᔾᔪᑎᖃᖅᑐᑎᒃ, ᐊᐱᕆᔭᐅᓚᐅᕐᓯᒪᓐᓂᕐᒪᑦ ᐱᓕᕆᖃᑎᒥᓄᑦ ᓇᓗᓇᐃᔭᐃᖁᔭᐅᓗᓂ ᐱᒋᐊᓕᕋᑖᖅᑐᓄᑦ ᐃᓕᓐᓂᐊᕈᑎᓂᑦ ᐊᑐᕐᓗᓂ ᐱᓪᓗᐊᑕᐅᔪᒥᑦ ᐃᓚᖓᓂᑦ ᒥᑭᔫᑎᕈᓗᐃᑦ ᓱᓇᑐᐃᓐᓇᐃᑦ. ᐱᓕᕆᐊᖃᓚᐅᖅᑐᓂ ᐅᖃᐅᓯᕆᓂᐊᖅᑕᖏᓐᓂᑦ, ᐅᑎᖅᑐᒥᓂᖅ ᐊᒻᒪ ᐅᖃᖅᑐᓂ


“ᖃᐅᔨᒪᕕᑦ, ᐱᔪᓐᓇᓚᐅᖏᑕᕋ. ᒥᑭᓪᓕᑎᕈᓐᓇᓚᐅᖏᑕᕋ ᐅᖃᐅᓯᕐᓄᑦ ᐃᓕᓐᓂᐊᓕᕋᑖᓄᑦ ᑐᑭᓯᔭᐅᔪᓐᓇᖅᑐᓄᑦ. ᑕᒪᐅᓇ ᑐᑭᖃᖅᑐᖅ ᐅᕙᒍᑦ ᑐᑭᓯᐅᒪᓗᐊᖏᓇᑦᑎᒍ.”


[ᑕᑯᑦᓴᑦ: ᓇᓗᓇᐃᕐᓯᒪᑦᓯᐊᖅᑐᒥᑦ ᐃᓱᒪᓂᖅ]


ᑕᒪᓐᓇ ᐅᖃᐅᓯᖃᖅᑐᖅ ᐊᓯᐊᓂᑦ ᐊᑑᑎᖃᒻᒪᕆᑦᑐᒥᑦᑕᐅᖅ ᐃᓚᖓᓂᑦ ᓇᓗᓇᖏᑦᑐᑦ ᐅᖃᐅᓯᕐᓄᑦ: ᓴᖅᑭᐸᑦᑐᖅ ᓇᓗᓇᐃᕐᓯᒪᑦᓯᐊᖅᑐᒥᑦ ᐃᓱᒪᓂᕐᒥᑦ. ᓇᓗᓇᐃᕐᓯᒪᑦᓯᐊᖅᑐᑦ, ᑐᕌᒐᖃᖅᑐᑦ ᐃᓱᒪᓕᐅᕆᔾᔪᑎᐅᔪᑦ ᑐᕌᕈᑎᐅᔪᓐᓇᖅᑐᑦ ᓇᓗᓇᖏᑦᑐᓄᑦ ᐅᖃᐅᓯᕐᓄᑦ. ᑐᑭᓯᒪᑦᓯᐊᕋᓂ ᐃᓱᒪᓂᖅ ᐊᑐᓕᕈᑎᐅᔪᓐᓇᕐᒪᑦ ᓇᓗᓇᐃᕐᓯᒪᖏᑦᑐᓂᑦ ᐅᕝᕙᓘᓐᓃᑦ ᐃᓗᓕᖃᓗᐊᖅᑐᒥᑦ ᐅᖃᐅᓯᕐᒥᑦ.


ᐃᓚᖓ ᐱᒻᒪᕆᐅᔪᖅ ᐃᓚᒋᔭᐅᔪᖅ ᓇᓗᓇᖏᑦᑐᓄᑦ ᐅᖃᐅᓯᕐᓄᑦ ᑐᑭᓯᐅᒪᓂᖅ ᑐᓴᖅᑎᒐᓱᑦᑕᓐᓂᒃ ᐊᒻᒪ ᐃᓱᒪᓕᐅᕆᔾᔪᑎᒋᔭᑎᑦ ᐱᓪᓚᕆᕈᖅᑎᐸᓪᓗᒋᑦ ᐊᒻᒪ ᐊᑑᑎᖃᑦᓯᐊᕐᓗᑎᒃ ᑕᐃᒃᑯᓄᖓ ᑐᓴᐅᒪᑎᒐᓱᑦᑕᓐᓄᑦ. ᑕᒪᐅᓇ ᑐᑭᖃᖅᑐᖅ ᐱᕈᐃᕙᓪᓕᐊᓂᖅ ᐊᒥᓱᓄᑦ ᖃᐅᔨᒪᔭᐅᔪᓂᑦ, ᐊᑐᖅᐸᓪᓗᓂ ᐱᓪᓚᕆᓐᓂᑦ ᐆᑦᑑᑎᓂᑦ ᐊᒻᒪ ᐅᖃᐅᓯᖃᖅᐸᓐᓂᖅ ᐊᒥᓱᓄᑦ ᐊᑐᖅᑕᐅᓯᒪᔪᓂᑦ ᐅᕝᕙᓘᓐᓃᑦ ᐅᓂᒃᑳᓕᐊᖑᓯᒪᔪᓂᑦ.


ᓲᕐᓗ, ᐃᓚᖏᑦ ᒐᕙᒪᒃᑯᓐᓄᑦ ᑖᒃᓰᔭᐃᔭᐅᑎᓄᑦ ᑎᑎᕋᕐᕕᑦᓴᖏᓐᓂ ᒪᓕᑦᑕᐅᕙᑦᑐᑦ ᒪᓕᒐᖏᓐᓂᑦ ᐊᑐᖅᑕᐅᓯᒪᓪᓚᕆᑦᑐᓂᑦ ᐆᑦᑑᑎᖃᖅᐸᑦᑐᑎᒃ.


ᐃᒻᒪᖄ ᐱᒻᒪᕆᐅᓂᖅᐹᖑᕙᓪᓚᐃᔪᖅ, ᓇᓗᓇᐃᔭᐃᒋᐊᖃᖅᑐᑎᑦ ᑐᑭᖏᓐᓂᑦ ᐊᒻᒪ ᐊᑑᑎᖏᓐᓂᑦ ᑐᑭᓯᒋᐊᕈᑎᐅᔪᑦ ᐅᖃᐅᓯᕆᔭᑎᑦ.


ᓲᕐᓗ, ᐱᓕᕆᔨᐅᓚᐅᕐᓯᒪᒍᕕᑦ ᐃᒫᓃᑦᑐᓂᑦ ᓯᓈᖏᓐᓂ ᖃᐅᔨᓴᖅᑎᓂᑦ ᐊᒻᒪ ᑭᒃᑯᑐᐃᓐᓇᕐᓂᑦ ᑐᑭᓯᐅᒪᖁᔨᒍᕕᑦ ᖃᓄᑎᒋ ᐊᖏᑎᒋᒻᒪᖔᖅ ᑕᐃᓐᓇ ᐃᖅᑲᓇᐃᔮᑦᓴᖅ, ᐅᑯᐊ ᐅᖃᐅᓯᕆᔪᓐᓇᖅᑕᑎᑦ:


ᐃᑉᐱᒍᓱᑦᑎᐅᔪᒍᑦ ᑲᓇᑕᐅᑉ 202,080 ᑭᓛᒥᑕᓕᒻᒥᑦ ᓯᔾᔭᖁᑎᐊᓂᑦ.


ᐅᓇ ᓇᓗᓇᕋᓂ ᐅᖃᐅᓯᐅᔪᖅ ᓱᓕᔪᒥᑦ ᓇᓗᓇᐃᔭᐃᑎᖃᖅᑐᓂ.


ᐅᕝᕙᓘᓐᓃᑦ, ᑐᕌᒐᖃᕈᒪᓂᕐᓴᐅᒍᕕᑦ ᑐᑭᖏᒍᑦ ᐊᓯᐊᒍᑦ ᓈᓴᐅᑎᒃᑯᑦ ᓇᓗᓇᐃᔭᐃᓂᕐᒥᑦ, ᐅᑯᐊ ᐅᖃᐅᓯᕆᔪᓐᓇᕐᒥᔭᑎᑦ:


ᐅᖓᑖᓃᑦᑐᑎᒃ 200,000 ᑭᓛᒥᑕᐃᑦ ᓯᔾᔭᖁᑎᐊᓂᑦ, ᑲᓇᑕ ᓯᔾᔭᒃᑭᐅᓛᖑᔪᖅ ᓴᓂᖏᓐᓂ ᓄᓇᓕᐅᔪᑦ ᓄᓇᕐᔪᐊᕐᒥᐅᑕᓂᑦ. ᓯᔾᔭᒃᑭᐅᓂᕐᓴᒻᒪᕆᐅᔪᒍᑦ ᑕᐃᒃᑯᓂᖓ ᑭᖑᓪᓕᕐᓂᒃ ᑕᓪᓕᒪᓂᒃ (5) ᑕᑭᓛᓂᑦ ᓯᔾᔭᖁᑎᓕᓐᓂᑦ ᓄᓇᓕᖃᕐᕕᓐᓂᑦ – ᑲᑎᑦᑐᒋᑦ: ᐃᓐᑐᓃᓯᐊ (Indonesia), ᕋᓴ (Russia), ᕕᓕᐲᓐᔅ (the Philippines), ᔭᐹᓐ (Japan) ᐊᒻᒪ ᐋᔅᑐᕋᐃᓕᐊ (Australia). ᐃᑉᐱᒍᓱᑦᑎᐅᔪᒍᑦ ᖃᐅᔨᓴᕐᓂᒃᑯᑦ ᑲᓇᑕᐅᑉ ᓯᔾᔭᖁᑎᐊᓂᑦ. ᑕᐃᒫ ᑕᕝᕙ ᐊᖏᔫᑎᒋᔪᖅ ᐃᖅᑲᓇᐃᔮᕆᕙᑦᑕᕗᑦ.


ᐊᑐᖅᑐᒍ ᑖᓐᓇ ᑐᓪᓕᐊ ᐅᖃᐅᓰᑦ, ᑲᑎᕐᓱᖅᑕᕗᑦ ᑕᒪᒃᑯᐊ ᐃᓗᐊᓄᑦ ᐊᒻᒪ ᓇᓗᓇᐃᔭᖅᑐᒋᑦ ᖃᓄᖅ ᑐᑭᖃᕐᒪᖔᑕ.


[ᑕᑯᑦᓴᑦ: ᐱᓪᓗᐊᑕᐅᔪᑦ]


ᓇᓗᓇᖏᑦᑐᑦ ᐅᖃᐅᓯᐅᔪᑦ ᐊᓯᖃᖅᑐᑦ ᐃᓱᒪᓂᑐᐃᓐᓇᐅᒐᑎᒃ ᐅᖃᐅᓯᐅᔪᑦ ᐱᑦᓯᐊᕐᓯᒪᒋᐊᖃᕐᓂᖏᓐᓂᑦ ᒪᓕᒐᖏᓐᓂᑦ ᐊᒻᒪ ᐋᖅᑭᑦᓱᐃᓂᕐᒥᑦ ᐅᖃᐅᓯᕐᓂᑦ. ᐱᓕᕆᔾᔪᑎᖃᕆᐊᖃᖅᑐᑎᑦ ᓇᓗᓇᖏᑦᑐᓂᑦ ᐅᖃᐅᓯᕐᓂᒃ ᑐᑭᓯᐅᒪᓗᑎᒃ ᐅᑯᓂᖓ:


ᓯᓚᐃᑦᑐᕈᓘᔮᕈᑎᐅᖏᒻᒪᑦ


ᒪᓕᑦᓯᒪᒻᒪᑦ ᓇᓗᓇᐃᕐᓯᒪᑦᓯᐊᖅᑐᒥᑦ ᐃᓱᒪᓂᕐᒥᑦ


ᖃᐅᔨᒪᔭᕆᐊᖃᖅᑕᑎᑦ ᑐᓴᐅᒪᖁᔭᑎᑦ


ᐃᓱᒪᓕᐅᕆᔾᔪᑎᑐᐃᓐᓇᕐᓂᒃ ᓄᓇᕐᔪᐊᕐᒨᕆᕙᑦᑐᑦ ᐊᑐᖅᐸᑦᑐᓂ ᓱᓕᔪᓂᑦ ᐆᑦᑑᑎᓂᑦ


ᐃᓗᓕᖃᖅᑐᖅ ᖃᐅᑕᒫᖅ ᐊᑐᖅᑕᐅᕙᑦᑐᒥᑦ ᐅᖃᐅᓯᕐᓂᑦ, ᓇᐃᑦᑐᓂᑦ ᐅᖃᐅᓯᕐᓂᑦ ᓇᓗᓇᐃᔭᐃᑎᓂᑦ


ᓇᓗᓇᐃᔭᐃᔪᑦ ᑐᑭᖏᓐᓂᑦ ᑐᑭᓯᒋᐊᕈᑎᐅᔪᑦ ᐅᖃᐅᓯᕆᑐᐃᓐᓇᕐᓇᒋᑦ ᐱᓕᕆᔾᔪᑎᐅᔪᑦ ᐊᑐᖅᑕᐅᓯᒪᔪᑦ


ᖃᐅᔨᒪᔨᑕᐅᖏᑦᑐᓄᑦ ᑐᓴᐅᒪᑎᑕᐅᓇᓱᐊᖅᑐᓄᑦ, ᐊᑐᖅᐸᑦᑐᓂ ᓇᓗᓇᖏᑦᑐᓂᑦ ᐅᖃᐅᓯᕐᓂᑦ ᑕᑯᑦᓴᐅᑎᑦᓯᕙᑦᑐᖅ ᐃᓱᒫᓘᑎᖃᕐᓂᕐᓴᐅᓂᕐᓂᒃ ᐊᑦᑐᐃᓂᓪᓚᕆᒻᒥᑦ ᐊᒻᒪ ᑐᓴᐅᒪᑎᑦᓯᓂᓪᓚᕆᒻᒥᑦ ᑕᑯᑦᓴᐅᑎᑦᓯᓇᓱᐊᕐᓇᑎᑦ ᖃᐅᔨᒪᔨᑕᒻᒪᕆᐅᓂᕐᓂᒃ ᐅᕝᕙᓘᓐᓃᑦ ᐱᒻᒪᕆᐅᓂᕐᓂᒃ.


ᑕᑯᑦᓴᐅᑎᑦᓯᔪᖅ ᐊᓯᓐᓂᒃ ᐃᑉᐱᒍᓱᓐᓂᕐᓂᒃ. ᓴᖅᑮᔾᔪᑎᐅᔪᑦ ᑕᑎᒋᔭᐅᓂᕐᒥᑦ ᐊᒻᒪ ᐃᑲᔪᕐᓱᐃᔾᔪᑎᓂᑦ.

Last modified: Wednesday, 30 October 2024, 3:20 PM